Дьокуускай куоракка саҥа кардиокииҥҥэ Уһук Илин үрдүнэн суос-соҕотох, күүстээх, чуолкайдык көрөр-истэр көмпүрүүтэрнэй томограбы таҥан үлэлэтиэхтэрэ. Аныгы технологиянан оҥоһуллубут күүстээх аппараат ыарыы диагноһын чопчу туруорарга улахан оруоллааҕа биллэр.
Өрөспүүбүлүкэтээҕи кардиологическай диспансер дириэктэрэ, мэдиссиинэ билимин дуоктора Күндүл Иванов быһаарарынан, Дьокуускайдааҕы 2-с №-дээх балыыһаҕа 64 срез кыамталаах томограф үлэлиир эбит. Саҥа томограф “убайыттан” түөрт төгүл үчүгэйдик, чуолкайдык көрөр кыахтаах. Билигин тустаах диспансерга 1,5 тесла кыахтаах МРТ үлэлии турар.
«Биһиги саҥа кииммит бары өттүнэн аныгы оҥоһуулаах буолара ситиһиллиэҕэ. Саамай сүрүнэ, Арассыыйаҕа биллэр-көстөр кииннэр туһанар технологияларын баһылыахпыт. Оччоҕуна Саха сирин олохтоохторо сүрэхтэрин, тымырдарын ыраах барбакка эрэ эмтэниэхтэрэ», – диэн Ил Дархан Айсен Николаев санаатын үллэстибит. Саҥа кардиокиин ис өттүн оҥоруу бара турар. Барыта биэс операционнай саалалаах буолуоҕа. Быйыл ахсынньыга мэдиссиинискэй тиэхиньикэлэри таҥан үмүрүтүөхтэрэ.
edersaas.ru