Саха сирин вице-премьерэ Ольга Балабкина өрөспүүбүлүкэ медицинскэй тэрилтэлэригэр суһал көмө саҥа массыыналарын күлүүстэрин туттарда.
Доруобуйа харыстабылын маҥнайгы сүһүөҕүн саҥардыыга федеральнай бырагыраама чэрчитинэн кэлбит уон «УАЗ Патриот» мааркалаах массыына Ил Дархан Айсен Николаев дьаһалынан өрөспүүбүлүкэ Хотугу уонна Арктическай улуустарын балыыһаларыгар түҥэтилиннэ. Ол курдук, «УАЗ Патриот» массыыналар күлүүстэрэ Эбээн Бытантай, Уус Маайа, Аллайыаха, Аллараа Халыма, Булуҥ, Үөһээ Дьааҥы, Үөһээ Халыма, Өлүөхүмэ уонна Муома улуустарын балыыһаларыгар туттарылынна.
«Массыыналар хотугу усулуобуйаҕа, биһиги улуустааҕы балыыһаларбытыгар үлэлииргэ ананан бэлэмнэниллибиттэр. Доруобуйа харыстабылын бастакы сүһүөҕүн модернизаиялааһыҥҥа тиэхиньикэнэн хааччыйыыны таһынан, үлэһиттэри бэлэмнээһин эмиэ ыытыллыахтаах. Онон кэлэр түһүмэххэ суоппардар квалификацияларын үрдэтии ыытыллыаҕа«, — диэтэ вице-премьер.
Ольга Балабкина этэринэн, бу бырагыраама чэрчитинэн биэс сыл устата 200-чэ массыына кэлиэхтээх. Суһал медицинскэй көмө ыстаансыйатын кылаабынай бырааһа Татьяна Андросова улуустар маны таһынан, телемэдиссиинэ сүбэтин-аматын оҥорорго аналлаах тэриллэри ылыахтара диэтэ.
«Саха сирэ» хаһыат, edersaas.ru
Мария Васильева (СИА) хаартысҕаҕа түһэриитэ