Аны билигин маҕаһыыҥҥа сылдьаргар дисконтнай каарта арааһын кумааһынньыккар укта сылдьарыҥ ирдэммэт. «Play market»-ка киирэн, анал сыһыарыыны хачайдаан, бородуукта уонна табаар атыылаһаргар суотабайгын эрэ көрдөрүөххүн наада, хас бырыһыаннаах чэпчэтии оҥоһуллуохтааҕа тута көстөн кэлиэ. Ити курдук биһиги олохпутун чэпчэтэр саҥа мобильнай сыһыарыылар элбээн иһэллэр. Оннооҕор балыыһаҕа бара сатаабакка, эмтиир бырааскын кытта online кэпсэтиэххин, анаалыс туттарарга кумааҕы ылыаххын сөп. Маннык саҥа технологиялары программистар оҥорон таһаараллар.
edersaas.ru
Сэтинньи 22 күнүгэр Сибээс уонна энергетика Дьокуускайдааҕы колледжыгар мобильнай сыһыарыыны оҥорор веб-дизайн лабораторията аһыллыаҕа. IT-хоһу үөрэх кыһатын салалтата Николай Осипов салайааччылаах «ЯкСтар» тэрилтэни кытта кыттыһан оҥордулар.
Лаборатория 20 үлэ миэстэтинэн, мунньахтыыр муннугунан, wi-fi уонна түргэн тэтимнээх интэриниэтинэн хааччылынна. Колледж салалтата аныгылыы толкуйдаах талааннаах оҕолор IT-эйгэҕэ саҥа арыйыы оҥорон сайдалларыгар, араас тэрилтэлэргэ бэйэлэрин көрдөрөллөрүгэр усулуобуйа тэрийдэ.
Аныгы технологияҕа булугас, сытыы өркөн өйдөөхтөрү түмэр IT-хос аһыллыытыгар “WorldSkills” бу эйгэҕэ идэтийбит эдэр дьон чөмпүйэнээттэрин бастакы сүүмэрдиир түһүмэҕэр колледж иһинээҕи күрэхтэһии ыытыллыаҕа. Ону таһынан, хакатон форумугар программистар, дизайнердар, «ЯкСтар» техническэй үлэһиттэрэ мустан, мобильнай сыһыарыы, саҥа платформа оҥорорго санааларын, уопуттарын үллэстиэхтэрэ.
Үөрэҕи сүрүннээччи уонна устудьуоннары үлэнэн хааччыйыыга үлэлэһэр Дмитрий Иванов: «Бастакы бырайыагы биһиги Ростелеком хампаанньаны кытта оҥорбуппут. Мультисервиснэй ситим лабораториятын арыйбыппыт билигин даҕаны үлэлии турар. Аны саас өссө саҥа бырайыагы олоххо киллэрэр санаалаахпыт», — диэн эттэ кини.
Марианна Тыртыкова, «Саха сирэ», edersaas.ru