“Колмар” хампаанньа “Соҕуруу Саха сирэ” урутаан сайдар сир резиденэ буолуоҕуттан, Инаглинскайдааҕы уонна Денисовскайдааҕы хайа байытар комплекстарыгар аһаҕас ньыманан уонна сир аннынан таас чоҕу хостуур. Сарсын, муус устар 26 күнүгэр, «Колмар» хампаанньа Нерюнгри оройуонугар Денисовскайдааҕы хайа байытар фабрикатын үлэҕэ киллэриэхтээх.
edersaas.ru
Денисовскайдааҕы шахтаны “Колмар” 2007 сыллаахха атыыласпыта. 2009 сыллаахха бастакы, оттон 2015 сыллаахха иккис уочаратын олоххо киллэрбитэ. Билигин 2 мөл. тонна чоҕу хостууллар. Хампаанньа былырыын ыам ыйыгар «Пекинская компания машин и оборудования АВИК Мэйлинь» хааччахтаммыт эппиэтинэстээх тэрилтэни кытары хантараак түһэрсэн, 4 мөлүйүөн тонна таас чоҕу таҥастыыр Денисовскайдааҕы хайа байытар фабрикатын тутуу туһунан кэпсэтии барбыта. Сыыйа, бырайыакка уларытыылар киллэриллэн, кыамтата 6 мөлүйүөн тоннаҕа диэри улаатыннарыллыбыта. Фабриканы уон ый эрэ иһигэр тутан үлэҕэ киллэрэн эрэллэр.
Денисовскайдааҕы шахтаттан үчүгэй хаачыстыбалаах таас чоҕу хостооннор, араас таһымнаах концентраты оҥорон таһаарар кыах үөскээтэ. Билигин Саха сирин чоҕо Японияҕа, Кытайга батарыллар.
«Колмарга» икки сыллааҕыта 2 тыһыынча киһи үлэлии-хамсыы сылдьыбыт буоллаҕына, саҥа тутуулар үлэҕэ киирдэхтэринэ, 4 тыһыынчаҕа тиийиэхтээх.
Ааспыт сылга өрөспүүбүлүкэ үрдүнэн барыта 16,8 мөл. тонна таас чох хостоммутуттан, баһыйар үгүһэ Нерюнгри оройуонун чоҕо. Денисовскайдааҕы байытар фабрика үлэҕэ киирдэҕинэ, 18 мөл. тоннаны хостооһун былааннанар.
Анивера Акимова, edersaas.ru