Бүгүн 16 ч. Саха сирин киин куоратын Ленин болуоссатыгар Арассыыйа үрдүнэн аан бастакынан Саҥа дьыллааҕы күөх харыйа уота күлүмүрдүү умайда.
edersaas.ru
— Саха сиригэр олус суолталаах сыл ааһан эрэр. Ол курдук, Саха сирэ Арассыыйа састаабыгар киирбитэ 385, Саха АССР төрүттэммитэ 95, СӨ Конституцията 25 үбүлүөйдээх сылларын бэлиэтээтибит. Үүнээри турар 2018 сыл өөссө ордук ситиһиилээҕэр эрэнэн туран, кэрэ-бэлиэ күннэри бэлэхтииригэр эрэллээхпит,— диэн бэлиэтээтэ бэйэтин эҕэрдэ тылыгар СӨ Быраатылыстыбатын Бэрэссэдээтэлин солбуйааччы Михаил Гуляев.
Дьааҥыттан аҕалыллыбыт Саҥа дьыллааҕы күөх харыйа уотун «Кыһын Саха сириттэн саҕаланар» кыһыҥҥы туризм бэстибээлин суолталаах ыалдьыттара Великай Устюгтан Тымныы Моруос оҕонньор уонна Татарстантан Кыш Бабай уматтылар.
Бу суолталаах тэрээһиҥҥэ аан дойдуга тымныыларынан аатырар Өймөкөөн улууһун дьаһалтатын баһылыга Михаил Захаров уонна Верхоянскай куорат дьаһалтатын баһылыга Евгений Потапов кыттыыны ыллылар.
Мин Ленин болуоссатыгар Саҥа дьыллааҕы харыйа уматыллар сиэригэр-туомугар кытта кэлбит аҕас-балыс кэрэчээн кыргыттары көрсөн, тэрээһин туһунан санааларын үллэстэллэригэр көрдөстүм.
Сунтаар Түбэйиттэн сылдьар Айталы Иванова (ИФКИС устудьуона), Арианна Степанова (юридическай колледж устудьуона) уонна Дьокуускай куорат национальнай гимназиятын 10-с кылааһын үөрэнээччитэ Карина Павлова, ини-биилэр оҕолоро анаан көрсөн, өрөспүүбүлүкэ сүрүн Саҥа дьыллааҕы харыйатын «умата» кэлбиттэр. Биллэн турар, кыргыттар үүнээри турар 2018 сылтан бэрт үгүс үөрүүнү күүтэллэр, чаҕылхай ситиһиилээх түгэннэри баҕараллар.
Оттон Орджоникидзе болуоссатын харыйатын уматыллар сиэригэр-туомугар Чысхаан Өймөкөөнтөн аҕалан, Тымныы символын Великай Устюгтан сылдьар Тымныы Моруос оҕонньорго туттарда.
Бу күннэргэ Өймөкөөн улууһугар нэдиэлэ устата 55-60 кыраадыс тымныы буола сырытта. Онон Тымныы символын Моруос оҕонньор Арассыыйа куораттарыгар тиэртэҕинэ, Саҥа дьыл саҕана дойду соҕуруу куораттарыгар биллэ тымныйыаҕа.
Өймөкөөн улууһун Томтор нэһилиэгиттэн сылдьар Валентина Прокопьева кэлиҥҥи сылларга бу болуоссакка ыытыллар Саҥа дьыллааҕы харыйаны уматыы сиэрин-туомун олох көтүппэтин туһунан этэн туран:
— Бэртээхэй сыл ааһан эрэр. Быйыл үбүлүөйбүн бэлиэтээтим, бэрт элбэх тэрээһиҥҥэ көхтөөхтүк кытынным. Онон мин олохпор олус бэлиэ сыл ааһан эрэр. Үүнэн эрэр саҥа 2018 сылтан эмиэ бэрт үгүс үөрүүлээх түгэни эрэнэ кэтэһэбин, — диэн санаатын үллэстэр Валентина Николаевна.
Бүгүн, ахсынньы 1 күнүттэн, Саҥа дьыл тыына билиннэ — өрөспүүбүлүкэ бары улуустарыгар Саҥа дьыллааҕы харыйалар сырдыгы, кэрэни, үйэлээҕи түстээн, күлүмүрдэс уотунан күндээрдилэр.
Елена ПОТОЦКАЯ, «Саха сирэ», edersaas.ru