Дьокуускай куорат киин болуоссаттарыгар саргылаах Саҥа дьылы көрсө дьэрэкээн харыйаны туруоран эрэллэр. Бүгүн Орджоникидзе болуоссатыгар хара сарсыардаттан үс улахан тиэхиньикэ кэлэн, харыйаны таҥыы үлэтэ саҕаланна. Ленин болуоссатыгар үлэ эмиэ күөстүү оргуйар.
Бырааһынньыктааҕы харыйа уотун үгэс быһыытынан, «Кыһын Саха сириттэн саҕаланар» бүтүн Арассыыйатааҕы бэстибээл чэрчитинэн, ахсынньы 1 күнүгэр саҕыахтара.
Илиҥҥи халандаарынан, ордуктаах (високоснай) 2020 сыл тимир бэлиэлээх маҥан кутуйах сыла дьулуурдаах, тулуурдаах, туруоруммут сыалларын саарбахтыы барбакка түргэнник олоххо киллэрэн иһэр дьоҥҥо көмөлөһүөҕэ. Үгүс дьон олунньуга биир күн ордуктаах сылтан куттаналлар, малааһын, уруу киэһэтин тэрийэртэн туттуналлар эрээри, оннук буолбатах.
2020 сылга ыал буоларга уонна дьиэ кэргэҥҥэ эбиллэргэ тоҕоостоох кэм диэн этэллэр. Муус маҥан дьүһүн ис сүрэхтэн иэйэн тахсар ыраас сырдык санааны кэрэһилиир.
Кутуйах – кыра эрээри, бэрт судургута суох харамай, оҕуруктаах киитэрэй өйдөөх, баар балаһыанньаны бэйэтин туһатыгар эргитэр, онон киниэхэ киирэн биэрбэт туһугар сэрэнэ-сэрбэнэ сылдьарга сүбэлииллэр.
Марианна Тыртыкова «Саха сирэ» хаһыат, edersaas.ru