«Саҥа дьыллааҕы бэтиэхэлэр» дьону-сэргэни көнньүөртүлэр, санааларын көтөхтүлэр диэн А.Е.Кулаковскай аатынан норуоттар доҕордоһууларын дьиэтин пресс-сулууспата иһитиннэрдэ.
Саҥа үүммүт сылы күүстээх санаалаах саҕалаатыбыт. Икки күн устатыгар А.Е. Кулаковскай аатынан норуоттар доҕордоһууларын дьиэтигэр «Саҥа дьыллааҕы бэтиэхэлэр» бэрт кэнсиэр буолла.
Дьоро киэһээлэргэ «Сыралҕан» мини-тыйаатыр (Нам улууһа), Анна Иннокентьевна Охлопкова салайааччылаах «Көөчөөн көрө» народнай тыйаатыр (Мэҥэ Хаҥалас), «Дьиикимдэ дьээбэлэрэ» (Горнай улууһа), Альберт Михайлов, ону сэргэ, сцена маастардара — Александр Бурнашев уонна Огдооччуйа көрү-нары көҕүлүттэн туттулар. Кэнсиэри виртуоз-баянист Виктор Дабайаан, эстрада ырыаһыттара Умсуура, Намыына, Михаил Майорскай ситэрэн-хоторон биэрдилэр. Икки чаастаах кэнсиэргэ көрөөччүлэр күлэн-салан, күннээҕи араас кыһалҕаларын хаалларан, дуоһуйа сынньанан тарҕастылар.
Дьоро киэһээ кэнсиэрин А.Е.Кулаковскай аатынан норуоттар доҕордоһууларын дьиэтин художественнай-постановочнай отдела тэрийдэ. Отделы СӨ култууратын үтүөлээх үлэһитэ Жанна Степановна Николаева салайар. Бырайыак ааптара — Альберт Петров, тустаах отдел сүрүннүүр исписэлииһэ. Режиссер – Людмила Антипина. Видеоконтент – Олег Романов, художественнай-постановочнай үлэ отделын сэбиэдиссэйэ. Светорежиссер – Александр Потапов. Звукооператор — Виктор Алексеев, култуурунай-маассабай үлэҕэ исписэлиис. Сценография – Эдуард Тойтонов, Филипп Христофоров, Игорь Семенов. Техническэй үлэҕэ эппиэтинэстээхтэр – Филипп Христофоров, Игорь Семенов.
А.Е. Кулаковскай аатынан норуоттар доҕордоһууларын дьиэтин пресс-сулууспата