Сунтаар улууһугар ууну ыраастыыр 12 ыстаансыйа оҥоһуллан бүттэ. Бастакы ыстаансыйа Кутана нэһилиэгэр арылынна.
edersaas.ru
Сунтаар улууһа Экология сылын ууну ыраастыыр ыстаансыйаны арыйан түмүктээтэ. Былаан быһыытынан, бу икки сыл устата улуус үбүнэн ууну ыраастыыр 12 ыстаансыйа олохтонуохтаах. Онтон биирдэстэрэ уонна бастакынан Кутана нэһилиэгэр арылынна.
Ууну ыраастыыр тутуулары «Эргиэнкомерс» тэрилтэ тутан үлэҕэ киллэрдэ. Ууну ыраастыыр тэрил барыта Германия оҥоһуга, чоҕунан уонна үрүҥ көмүс бытархайынан ыраастаан таһаарыы.
Бу ыстаансыйаны кытары Түбэй, Түбэй Дьаархан, Сиэйэ ууну ыраастыыр тэрилтэлэрин урбаанньыт Владислав Васильев көрөн-истэн үлэлэтиэҕэ. 19 лиитэрэлээх бытыылкаҕа кутуллубут уу сыаната 100 солк. буолуоҕа. Маны таһынан дьиэҕэ тиэрдэн биэрии өҥөтө баар буолуо диэн иһитиннэрдэ.
Ыраастаммыт ууну бастакынан амсайбыт олохтоох дьон саҥа дьылы ыраас ууннан көрсөбүт диэн үөрэллэр уонна улуус баһылыгар А.В.Григорьевка, улуус дьокутааттарыгар, нэһилиэк баһылыгар Н.В.Давыдовка, туппут тэрилтэҕэ махталларын биллэрэллэр.
Кэлэр сыл тохсунньу 3 күнүттэн хаалбыт 11 ыстаансыйа үлэҕэ киирэн, нэһилиэнньэни ыраас ууннан хааччыйыахтара!
Мария КОБЕЛЬЯНОВА — ТУСКУЛААНА, edersaas.ru