Уһун өрөбүллээх тохсунньу томороон тымныыларыгар ханна да барбакка-кэлбэккэ, дьиэҕэ ас астана-астана киинэ көрөр бэйэтэ туспа үчүгэйдээх. Онуоха ханнык киинэлэри көрөбүт? Бүгүн эһиэхэ анаан саҥа дьыллааҕы сахалыы киинэлэри мустубут.
edersaas.ru
«Кыһын тымныы эрээри дьоллоох дьоҥҥо ичигэс»
Сыл: 2008
Режиссер: Роман Дорофеев
«Кыһын тымныы эрээри дьоллоох дьоҥҥо ичигэс» диэн киинэ аата сахаларга бэргэн этии буолбута ыраатта. Киинэ дьоруойдара бастаан араас кыһалҕаҕа түбэһэн баран, эмиэ бу санаанан салайтаран, Саҥа дьылы дьоллоохтук көрсөллөр.
«Давлят 3»
Сыл: 2014
Режиссер: Прокопий Федоров
Татаар ааттаах тиис бырааһа Давлят мүччүргэннээх сырыыларын үһүс чааһа. Саҥа дьыл саҕана, Давлят кэргэнин кытары Тымныы Моруос уонна Хаарчаана буолан, харчылаһарга соруналлар. Оҕолорун кимиэхэ хаалларалларын туһунан боппуруос үөскүүр. Онуоха дэриэбинэттэн эһээлэрин ыҥыраллар.
«Ньургуһуннар»
Сыл: 2013
Режиссер: Сергей Потапов
Дьокуускай. Саҥа дьылга бэлэмнэнии үгэнэ. Гоша – түмэл харабыла. Олоҕор туох да үчүгэй суох курдук: ийэтэ орон киһитэ, туох да туһаны аҕалбат үлэ. Ийэтигэр сыһыана соччото суох. Ол эрээри, харабыл олоҕо Эмиль диэн үөрбүт-көппүт уолу көрсүөҕүттэн тосту уларыйар
«Чысхаан»
Сыл: 2015
Режиссер: Данил Осипов
Боростуой тыа уола уонна атаах икки игирэ уолаттар Чысхаан дойдутугар тиийэллэр. Аптаах устуоруйаны оҕолоргутун кытта көрөр өссө үчүгэй буолуо.
«Аптаах дорҕоон»
Сыл: 2016
Режиссердар: Алексей Амбросьев, Александр Лукин
Саҥа дьыл уһун сынньалаҥнарыгар Муусука үрдүкү оскуолатын иитиллээччилэрэ Туйаара, Ньургун, Айтал интэринээккэ хаалаллар. Ол сылдьан, былыргы скрипканы булан ылан, куһаҕан тыыны уһугуннараллар. Айхи диэн аптаах киһи Саҥа дьылы уоран, аан дойдуну баһылаары гынар. Табаарыстыылар кини утары уонна эйэ иһин охсуһуохтара.
«Елки новые»
Сыл: 2017
Бу нуучча киинэтигэр биһиги биир дойдулаахпыт, Саха тыйаатырын артыыһа Геннадий Турантаев аҕыйахта көстөр да буоллар, ааттыыр тустаахпыт. «Елки» киинэҕэ кини Тымныы Моруос оҕонньору оонньообута.
Виктория Бястинова, edersaas.ru