Саҥа дьыллааҕы бэлэх онлайн-атыыта элбээбит

Ааптар: 
02.01.2021
Бөлөххө киир:

Арассыыйаҕа онлайн-атыы биир сүрүн хампаанньата Wildberries саайт интэриниэтинэн сакаастаан атыылаһыы үрдээбитин бэлиэтээбит. Ыытыллыбыт чинчийии көрдөрбүтүнэн, атыы кээмэйэ икки төгүл үрдээбит. Холобур, 2019 сылга бу маҕаһыыҥҥа ахсынньы ый маҥнайгы аҥаарыгар күҥҥэ ортотунан 700 тыһыынча сакаас оҥоһуллар эбит буоллаҕына, оттон 2020 сылга ити болдьоххо күҥҥэ 1,5 мөлүйүөн кэриҥэ сакаас киирбит.

edersaas.ru

Биллэн турар, бу хамсык кэмигэр дьиэҕэ бүгэн олорууттан тахсар. Үгүс дьон Саҥа дьыллааҕы кэһиилэри эрдэттэн онлайн сакаастаан ылар буолбут. Хамсыктан сылтаан дьон кэһиигэ арыый ыарахан сыаналаах табаардары ылар буолбута көстөр. Бу көстүүнү чинчийээччилэр, дьон уоппускаҕа омук сиригэр көппөккө, араас аралдьытар тэрээһиннэргэ сылдьыбакка, бэйэлэригэр уонна чугас дьонноругар кэһии атыылаһарга ордук үптэммиттэринэн быһаараллар.

Холобур, косметика наборугар 21% кэриҥэ үрдээбит (ахсаана 232%). Минньигэс астаах набор сыаната 23% үрдээбит (ахсаана 198%).

Тымныы кыһын сабыдыала — кыһыҥҥы таҥас атыыга хото барбыт. Күндү түүлээхтэн саҕынньах (+91%), синтетика түүлээх — (+62%), бэргэһэ (+94%) хаар түһүөҕүттэн атыыга күүскэ барбыттар. Ону таһынан, киэргэл атыыта 80% кэриҥэ үрдээбит.

Дьиэттэн олорон үлэлээһин уонна үөрэнии ноутбук атыытын саҥа таһымҥа таһаарбыт — былырыыҥҥы сылга холоотоххо  481% үрдээбит. Планшеттар эмиэ үчүгэйдик атыыламмытар.

Сакаасчыттар орто саастара үрдээбитэ көстөр. Эбээлэр уонна эһээлэр смартфон нөҥүө сиэннэригэр анаан кэһии атыылаһарга үөрэммиттэр. Ахсынньы икки нэдиэлэтин иһигэр Wildberries нөҥүө 3 млн кэриҥэ оонньуур атыыга барбыт. Саамай элбэхтик конструктордар (320 тыһ. устуука), иккис миэстэҕэ — оонньуур набордара (220 тыһ. устуука), үһүс миэстэҕэ — куукулалар (180 тыһ. кэриҥэ).

«Саха сирэ» хаһыат, edersaas.ru

Хаартыска: New Retail

+1
0
+1
0
+1
0
+1
0
+1
0
+1
0
+1
0