Сунтаар улууһун Кутана олохтоохторо кэлэн иһэр Саҥа дьылы саҥа дьиэҕэ көрсөр буоллулар.
Кутанаҕа «Дьону хаарбах дьиэттэн көһөрүү» федеральнай бырагыраама чэрчитинэн тутуллубут толору хааччыллыылаах 12 кыбартыыралаах таас дьиэ үлэҕэ киирдэ.
Үөрүүлээх тэрээһиҥҥэ саҥа дьиэҕэ киирбит 12 ыалы СӨ Бырабыыталыстыбатын бэрэссэдээтэлин солбуйааччы Михаил Никифоров, улуус баһылыга Анатолий Григорьев, Кутана нэһилиэгин баһылыга Николай Давыдов эҕэрдэлээтилэр.
Тутууну «Айан суол» ХЭУо толордо. Тустаах эбийиэк үлэҕэ киллэриллэригэр олохтоохтор бэйэлэрэ улахан күүс-көмө буоллулар.
Кутана нэһилиэгэ улууска элбэх таас тутуулааҕынан биллэр. Ол курдук, манна таас тутуулаах оҕо уһуйаана уонна орто оскуола олохтоохтор киэн туттууларынан буолар. Инникитин култуура саҥа таас дьиэтин былаанныыллар.
Манна сыһыаран эттэххэ, Дойду саамай улахан бырагыраамата -– саахалланар кутталлаах дьиэттэн дьону көһөрүү өрөспүүбүлүкэҕэ киэҥ хабааннаахтык үлэлиир. Онуоха, бастатан туран, дьон доруобуйатыгар уонна олорорго кутталы үөскэтэр дьиэлэртэн көһөрүү ыытыллар.
СӨ Ил Дархана Айсен Николаев Анал этиитигэр бэлиэтээбитинэн, саахалланар кутталлаах дьиэлэртэн дьону көһөрүү бырагыраамата киириэҕиттэн быйыл хаһааҥҥытааҕар да элбэх киһи көһөрүлүннэ (12 тыһыынча кэриҥэ).
Надежда ЕГОРОВА, «Саха сирэ», edersaas.ru