Уһун сынньалаҥнаах күннэргэ — мэдиссиинэ көмөтө

Ааптар: 
Бөлөххө киир:

Айсен Николаев доруобуйа харыстабылын тэрилтэлэрэ Саҥа дьылга сынньанар күннэргэ, үлэни тохтоло суох хааччыйалларыгар соруйда.

Бырааһынньык күннэригэр мэдиссиинэ көмөтө оҥоһулла туруоҕа. СӨ Ил Дархана Айсен Николаев суһал ыстаапка мэдиссиинэ тэрилтэлэрэ төгүрүк суукка үлэлииллэрин тэрийэллэригэр, эминэн-томунан, куойканан, кислородунан о.д.а. наадалааҕынан хааччыллалларыгар соруйда.
Уһуйааннар уонна оскуолалар бырааһынньыктара тэрилтэни дезинфекциялыырга анаан сынньалаҥнаах (тохтобуллаах) ыытыллыахтара. Итинник дезинфекциялары оҥоруу култуура тэрилтэлэригэр эмиэ ыытыллыахтара.
Маны сэргэ, Ил Дархан дьон мустар сиригэр, ол иһигэр атыы-эргиэн кииннэригэр уонна кууһунан атыылыыр баазаларга санитарнай-эпидемиологическай ирдэбили тутуһууга хонтуруолу күүһүрдэргэ эттэ.
Улахан болҕомтону коронавирустан вакцинацияҕа ууралларыгар соруйда. «Быһыыны туруорар хампаанньаттан коронавирус балаһыанньата тутулуктааҕын статистика көрдөрөр. Нерюнгри, Мииринэй, Сунтаар оройуоннара быһыыны ылыыга 65% таһымыгар тиэрдибэтилэр уонна коронавируһунан саҥа ыалдьар дьонун ахсаанынан күн ахсын инники сылдьаллар. Оттон быһыыны туруоруу ханна сөптөөх таһымҥа ыытыллыбытай да, онно ыалдьааччы ахсаана аҕыйыыр«, — диэтэ Айсен Николаев.
Бэлиэтээн эттэххэ, өрөспүүбүлүкэҕэ кэнники нэдиэлэҕэ коронавируһунан ыалдьыы ортотунан 11,7% намтаабыт. Балыыһалар кислород саппааһынан, мэдиссиинэ тэрилтэлэрэ, аптекалар эминэн-томунан хааччыллыбыттар.
Маны сэргэ, суһал ыстаап омикрон көстүбүт дойдуларыттан кэлээччилэргэ, эпидемияны утарар уонна профилактикалыыр тэрээһини оҥорорго анаан туһунан обсерватор уонна стационар бэлэмниир.
Роспотребнадзор Саха сиринээҕи Управлениетын чахчытынан, бүгүҥҥү күҥҥэ өрөспүүбүлүкэҕэ «омикронунан» ыалдьыбыт киһи суох. Дьаҥ бу көрүҥүн булбут дойдуларыттан уонна быысаһа сытааччыларыттан кэлээччилэри,  бигэргэтиллибит алгоритмынан ИДьМ кытта бииргэ кэтээн көрүү ыытыллар.
Андрей Сорокин (СИА) хаартыскаҕа түһэриитэ
+1
0
+1
0
+1
0
+1
0
+1
0
+1
0
+1
0