Суорун Омоллоон аатынан Опера уонна балет тыйаатырын дириэктэринэн Свердловскай уобаластан кэлбит Сергей Юнганс буолара быһаарылынна.
Биллэрин курдук, быйыл атырдьах ыйын ортотугар, СӨ Суорун Омоллоон аатынан Опера уонна балет судаарыстыбаннай тыйаатырын дириэктэрин дуоһунаһыгар аһаҕас куонкурус биллэриллибитэ. Ким баҕалаах кыттарыгар кыах бэриллибитэ. Ол курдук, “Саха Өрөспүүбүлүкэтин хамаандата” диэн анал саҥа портал арыллыбыта. Бу портал инникитин даҕаны, өрөспүүбүлүкэ салайар каадырдарын эрэсиэрбэтин сүүмэрдииргэ туттуллуоҕа.
Куонкуруска, дириэктэргэ хандьыдаакка ирдэбил төһө даҕаны улаханын үрдүнэн, элбэх сайаапка киирбит. Бастакы түһүмэххэ (кэтэхтэн) 26 кандидатура көрүллүбүтүн кэннэ иккискэ – дьыалабыай оонньууга, биирдиилээн интервьюга уонна тыйаатыр сайдыытыгар бырагыраамаларын көмүскээһиҥҥэ 7 киһи талыллыбыта. Кинилэр бэйэлэрин “бырайыактарыгар”, биир күн иннинэ бэриллибит кейстэри быһаарыылары киллэриэхтээхтэрэ. Бу түһүмэх кыайыылаахтара, үс киһи финалга тахсыбыта – Саха Өрөспүүбүлүкэтиттэн култуура, искусство диэйэтэллэрэ Захар Никитин, Саргылаана Борисова уонна Свердловскай уобаластан туруорааччы-режиссер Сергей Юнганс.
Бүгүн өрөспүүбүлүкэ салалтатын кытта бэсиэдэлэһии кэнниттэн, Суорун Омоллоон аатынан Опера уонна балет судаарыстыбаннай тыйаатырын дириэктэрин дуоһунаһыгар Сергей Юнганс кандидатуратын бигэргэтэргэ быһаарбыттар.
Бу туһунан суруналыыстарга СӨ Бырабыыталыстыбатын Бэрэссэдээтэлэ Владимир Солодов уонна СӨ култууратын, духуобунай сайдыытын миниистирэ Юрий Куприянов иһитиннэрдилэр.
—Сергей Сергеевич Юнганс режиссер быһыытынан Арассыыйаҕа да, тас дойдуларга даҕаны үгүс туруоруулардаах, дойдуга биллэр-көстөр исписэлиис. Сэттис сылын Екатеринбурга Мусукаалынай кэмиэдьийэ тыйаатырын салайар. Биһиги тыйаатырбыт сайдыытыгар дьоһуннаах, ураты, сонун көрүүлэрдээх. Эдэр, амбициознай диэйэтэл. Кини кэлиитэ биһиги эрэгийиэммит култуураҕа биир тутаах тэрилтэтин саҥардыыга оруоллаах буолуо диэн эрэнэбин. Биллэн турар, бырабыыталыстыба саҥа дириэктэри бары өттүнэн өйүөҕэ, — диэтэ Владимир Солодов.
Култуура уонна духуобунай сайдыы миниистирэ Юрий Куприянов, Сергей Юнганс национальнай өрөспүүбүлүкэлэргэ, холобур Татарстан, Башкирия уонна Чувашия тыйаатырдарыгар ситиһиилээх туруорууларынан биллэр диэн тоһоҕолоон бэлиэтээтэ.
— Биһиги тыйаатырбыт өссө сайдан, өссө саҥа таһымҥа тахсан иһиэн олус баҕарабыт. Ол кистэл буолбатах. Сергей Юнганс эдэр, 36 саастаах, ол эрээри уопуттаах режиссер, бэйэтэ театральнай дьиэ кэргэнтэн тахсыбыт киһи. Опера уонна балет тыйаатырын ситиһиилэрэ, кыайыылара бааллар, бары билинэбит, сыаналыыбыт, ол эрээри, дьон уларыйыыны күүтэрин эмиэ билэбит. Тыйаатыр салгыы сайдан иһиэхтээх, — диэтэ Юрий Степанович.
Оттон Владимир Солодов, уопсайынан бу куонкурус түмүгүнэн биһиги култуураҕа олус үчүгэй, кэскиллээх каадырдар баалларын өссө төгүл көрөн итэҕэйдибит. Кинилэр өрөспүүбүлүкэҕэ салайар каадырдар эрэсиэрбэлэригэр болҕомто киинигэр киирдилэр. Холобур, СӨ Култуура уонна искусство кэллиэһиттэн икки кандидатура турбута бу үөрэх кыһатын туһунан элбэҕи этэр, диэн үрдүк сыанабылы биэрдэ.
Татьяна МАРКОВА.
Андрей Сорокин хаартыскаҕа түһэриилэрэ.