Горнай улууһун Бэс Күөлүгэр «Кэскил» түөлбэҕэ саҥа тутуллан киирбит 34 дьиэҕэ түргэн интэриниэти киллэрдилэр.
Бу өҥөнү «АрктикТелеком» хампаанньа толордо. СӨ Инновацияҕа, сыыппараны сайыннарыыга уонна инфокоммуникационнай технологияҕа миниистир Анатолий Семенов иһитиннэрбитинэн, суһал ыстаап быһаарыытынан алтынньы 15 күнүгэр диэри хас биирдии саҥа дьиэҕэ интэриниэти киллэрэр сорук туруоруллубутун болдьоҕор толорбуттар. Ил Дархан Айсен Николаев уонна СӨ Бырабыыталыстыбатын быһаччы сорудахтарынан, «АрктикТелеком» АУо «оптиканы дьиэҕэ» (GPON) диэн технологиянан Бэс Күөлүгэр оптика утаҕын тардар бырайыагы оҥорон бэлэмнээбитэ. Онон билигин олохтоохтор түргэн интэриниэти туһана олороллор. Саамай сүрүнэ, оҕолор ыраахтан олорон үөрэнэр кыахтаахтар.
«Биһиги Бэс Күөлүгэр дьоҕус нэһилиэнньэлээх нэһилиэктэргэ аналлаах моделы туһанныбыт. Онно телевидение уонна араадьыйанан биэриилэр киирэллэр. Биһиги итинэн эрэ тохтообоппут, ол эбэтэр хас биирдии дьиэҕэ түргэн интэриниэти киллэрэргэ сайаапка хомуйабыт. Тоҕо диэтэххэ, үгүс оператор чааһынай дьиэлэргэ интэриниэти киллэрии барыһа суоҕун иһин дьоҕус нэһилиэктэргэ үлэлиэхтэрин баҕарбаттар. Ол иһин ити соругу «АрктикТелеком» диэн судаарыстыбаннай өрөспүүбүлүкэтээҕи хампаанньа толоруоҕа» — диэн миниистир Анатолий Семёнов быһаарда.
Кини интэриниэт хаачыстыбата уонна кыамтата суотабай төлөпүөнүнэн өрөспүүбүлүкэтээҕи телеканаалларга быһа тахсары толору хааччыйар кыахтааҕын туһунан иһитиннэрдэ.
«Бу сылга биһиги социальнай суолталаах эбийиэктэргэ түргэн интэриниэти холбууру ситистибит. Ол курдук, федеральнай үбүнэн оҕо саадтарыгар, оскуолаларга уонна дьаһалталарга киллэрдибит. Эһиил «цифровой тэҥэ суох буолууну туоратыы» диэн бырагыраама чэрчитинэн, кэлэр сылга сөптөөх үлэни ыытыахпыт. Холобур, 43 нэһилиэнньэлээх пууҥҥа үөһэ этиллибит түргэн интэриниэт киирэ илик. Онон нэһилиэнньэлээх пууну талыыга судаарыстыбаннай өҥө порталыгар куоластааһын саҕаланна. Билигин аныгы нэһилиэккэ гаас, уот эрэ буолбакка, интэриниэт эмиэ баар буолуохтаах», — диэн Анатолий Аскалонович быһааран биэрдэ.
Алтынньы 31 күнүн кэнниттэн түргэн интэриниэккэ Бэс Күөлүн атын дьиэлэрэ холбонуохтарын сөп.
Александр Тарасов, «Саха сирэ» хаһыат, edersaas.ru