Өрөспүүбүлүкэ Ил Дархана Айсен Николаев Ил Түмэҥҥэ Анал этиитигэр хаарбах дьиэттэн көһөрүү бырагыраамата кэлэр сылларга өссө күүскэ ыытыллыан туһунан эппитэ.
Оттон бэҕэһээ Мэҥэ Хаҥалас улууһун Майа сэлиэнньэтигэр үөрүүлээх быһыыга-майгыга хаарбах дьиэлэртэн көспүт ыалларга саҥа дьиэ күлүүстэрин туттардылар. Саҥа кыбартыыраҕа тиксибиттэртэн биирдэстэринэн Татьяна Валерьевна Романова буолар.
— Биһиги 1964 сыллаахха тутуллубут дьиэҕэ олорбуппут. Ол дьиэ биһиэхэ төрөппүттэрбититтэн тиксибитэ. Онно 1989 сыллаахха көһөн кэлбиппит. Билигин хаарбах дьиэттэн дьону көһөрүү бырагыраамата үлэлээн, саҥа дьиэҕэ көһөр буоллубут. Бэҕэһээ күлүүһү ылбыппыт. Бу саҥа дьиэбит Исаев уулуссатыгар турар. Онон 4 этээстээх 56 кыбартыыралаах таас дьиэҕэ олорор буолбуппутуттан үөрүүбүт улахан. Уопсайынан, 11 дьиэҕэ олорбут ыаллар икки саҥа дьиэҕэ көһөн киирэр буоллубут. Саҥа дьиэлэри “Мегинострой” уонна “Арктика-строй” тэрилтэлэр туттуллар. Онон хаарбах дьиэлэргэ олорбут ыаллар тутааччыларга махтанабыт! Саҥа дьиэҕэ көһөн киирэр бары ыаллары кэлэн иһэр саргылаах Саҥа дьылынан ис сүрэхпиттэн эҕэрдэлиибин!– диэн Татьяна Валерьевна үөрүүтүн үллэһиннэ.
Бэлэмнээтэ Женни Стрюкова
Хаартыска: интэриниэттэн