Нам сэлиэнньэтигэр хаарбах дьиэҕэ олорбут дьоҥҥо саҥа сыл үөрүүлээхтик саҕаланна.
Кинилэр «2019-2025 сылларга хаарбах туруктаах дьиэттэн көһөрүү» өрөспүүбүлүкэтээҕи бырагырааманан тутуллубут саҥа түөрт мэндиэмэнээх дьиэ күлүүһүн туттулар. Бу үөрүүлээх бэлиэ түгэнинэн, СӨ Ил Дархана Айсен Николаев Нам улууһугар үлэтинэн тиийэ сылдьан, ыалдьыттаата. Саҥа дьиэ хаһаайыттарыгар эҕэрдэтин тиэртэ.
Бу үөрүүлээх түгэнинэн саҥа дьиэ хаһаайыттарын СӨ Ил Дархана Айсен Николаев эҕэрдэлээтэ. «Тохсунньу үгэннээн турдаҕына, Намҥа бэртээхэй дьиэлэр тутуллан киирэллэр. Биһиги, Саха сирин дьоно-сэргэтэ, хаачыстыбалаахтык тутуллубут уонна сылаас дьиэни сыаналыыбыт. Маннык тымныылар түһэн турдахтарына, толору хааччыллыылаах сылаас дьиэ төһөлөөх наадатын өйдүүбүт«, — диэтэ Ил Дархан.
Ил Дархан биһиги өрөспүүбүлүкэбит хаарбах дьиэттэн дьону көһөрүү бырагырааманан саамай элбэх үбү-харчыны ыларын эттэ. Бу бырагыраама улахан куораттарга эрэ буолбакка, улуустарга эмиэ үлэлиир.
«Намҥа толору хааччыллыылаах эрэ буолбакка, өссө куукуна миэбэлинэн кытары толору тэриллибит кыбартыыралар киллэрилиннилэр. Бу өрөспүүбүлүкэбитигэр аан бастакы көстүүнэн буолар«, — диэн бэлиэтээтэ Айсен Николаев. Мантан кэлэр сылларга Нам оройуонугар бу бырагырааманан 30 тыһ.кв.м. иэннээх тутуу ыытыллыахтаах, 2099 киһи хаачыстыбалаах саҥа дьиэҕэ көһүөхтээх.
Нам улууһун баһылыга Юрий Слепцов улууска бырагырааманы олоххо киллэриигэ өйөбүллэрин иһин өрөспүүбүлүкэ салалтатыгар, Бырабыыталыстыбаҕа махтанна. «Улууска 2025 сылга диэри хаарбах дьиэттэн дьону көһөрүү бырагырааматынан, 30 тыһ.кв.м. иэннээх тутуу былааннанар. Бу киирбит дьиэ Нам сэлиэнньэтигэр онус таас дьиэнэн, оттон 2019-2020 сылларга бырагырааманан түһүмэххэ төрдүһүнэн буолар», — диэтэ кини.
Оройуон киин уулуссатыгар тутуллубут 31 кыбартыыралаах дьиэ генеральнай бэдэрээччитэ «АЭБ Капитал» ХЭУо. Үөрүүлээх тэрээһиҥҥэ саҥа дьиэ бэлиэтин — күлүүһү «АЭБ Капитал» ХЭУо генеральнай дириэктэрэ Игорь Борисов нэһилиэк баһылыгар Андрей Новгородовка туттарда.
Бэлиэтээбиттэринэн, дьиэ хаачыстыбалаах матырыйаалларынан тутуллубут. Кыбартыыраларга оҥоһуллубут миэбэллээх, уотунан-күөһүнэн үлэлиир билиитэлээх, суунар-тараанар (бааннай) хос, куукуна, киирии барыта аныгы үйэ ирдэбилинэн. Саҥа дьиэ-уот таһыгар элбэх хайысхалаах успуорт былаһаакката баар.
«Биһиги өрөспүүбүлүкэ бу бырагырааматыгар салгыы кыттан хаарбах, саахалланар туруктаах дьиэттэн көһөрүүгэ бэйэбит кылааппытын киллэрсэр соруктаахпыт«, — диэн «Алмазэргиэнбаан» АКБ АУо бырабылыанньатын бэрэссэдээтэлин солбуйааччы Анатолий Табунанов бэлиэтиир. Саҥа дьиэ хаһаайыттарын аатыттан махтал тылларын Лена Слепцова тиэртэ.
Манна даҕатан эттэххэ, «2019-2025 сылларга хаарбах туруктаах дьиэттэн гражданнары көһөрүү» өрөспүүбүлүкэтээҕи бырагыраама чэрчитинэн, Намҥа 38 дьиэттэн дьону көһөрүү былааннанар.
СӨ Ил Дархан уонна Бырабыыталыстыба пресс-сулууспата
Андрей Сорокин (СИА) хаартыскалара
+1
+1
+1
+1
+1
+1
+1