Үһүс зондировщик-сөмөлүөт кэлиэҕэ

Бөлөххө киир:

Бэс ыйын 10 күнүн кэнниттэн “Ан-26” зондировщик-сөмөлүөт кэлэн, ардаҕы ыҥырарга үлэлиэҕэ. Сөмөлүөтү ойуур баһаардарын умуруорарга анаан «Авиалесоохрана» ыҥыран үлэлэтэр. Ол туһунан Ойуур хаһаайыстыбатын федеральнай ааҕыныстыбатын салайааччытын солбуйааччы Алексей Венглинскэй Саха сиригэр кэлэ сылдьан эттэ.

Бу зондировщик-сөмөлүөтү таһынан, өссө МИ-8-МТБ-1 бөртөлүөт кэлэн ыраах сытар, суола-ииһэ суох сирдэргэ десантник-парашютистары быраҕыыга үлэлиэҕэ.

—  Федеральнай бүддьүөттэн тыырыллыбыт үбү таһынан, Айсен Николаев эрэгийиэн бүддьүөтүттэн эбии харчыны ойуур баһаардарын умулларар салгын аалларын аҕалыыга ыыппыта. Бүгүн “Рослесхоз” салайааччыта Иван Советниковтыын эбии көмө миэрэлэрин туһунан кэпсэтиэхпит. Саха сиригэр ойуур баһаардарын балаһыанньата уустугурдаҕына, “Авиалесоохрана” парашютист-десантниктарын федеральнай саппаастарыттан эбии күүһү ыытыахпыт. Билиҥҥитэ баһаар балаһыанньата этэҥҥэ. Онон эрдэттэн дьону, тиэхиникэни аҕалар табыгаһа суох. Ол эрээри, ханнык да балаһыанньаҕа, авиация кэлэн үлэлиэҕэ. Саха сиригэр үлэлиир былааммыт чопчу оҥоһуллан турар, — диэн кини эттэ.

Ыам ыйын 13 күнүттэн өрөспүүбүлүкэҕэ “Росгидромет” “Як-42” сөмөлүөт-лабораторията үлэлээбитэ. Бэс ыйыгар диэри 9 көтүүнү оҥорбута. Уус-Маайа, Алдан, Нерюнгри, Өлүөхүмэ, Уус Алдан, Мэҥэ Хаҥалас, Амма, Бүлүү бөлөх  улуустарыгар ардаҕы түһэрбитэ.

“Росгидромет” “Ан-30М” диэн иккис зондировщик-сөмөлүөтэ бэс ыйын 2 күнүгэр кэлбитэ. Бу икки сөмөлүөт уопсайа 130 чаас көтүөхтээхтэр. Саха сирин быыһыыр сулууспата Киин аэрологическай обсерваторияны кытары хантараак түһэрсибитэ. Манна эрэгийиэн бүддьүөтүттэн 79 мөлүйүөн солкуобай көрүллүбүтэ.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru

+1
0
+1
0
+1
0
+1
0
+1
0
+1
0
+1
0