Бу дьыл ахсынньы 9 күнүгэр Аллайыаха улууһун Чокурдаах сэлиэнньэтигэр биир киһи итирэн баран, бииргэ олорор дьахтарын кытта кыыһырсыбыт.
Ол кыыһырбыт уоҕар, дьахтара көтөҕөн турбут 3 ыйдаах уолчаанын көхсүгэ быһаҕынан анньыбыт. Иһигэр хаан турбут, быара эмсэҕэлээбит кыракый эрэйдээҕи бастаан улуустааҕы киин балыыһаҕа киллэрбиттэр.
Ахсынньы 11 күнүгэр оҕону Дьокуускай куоракка Национальнай медицинскэй кииҥҥэ санитарнай сөмөлүөтүнэн аҕалбыттар. Туруга ыарахан.
Уорбаланааччы тутуллубут. Кинини силиэстийэлиир изоляторга хаайар туһунан боппуруос көрүллэр.
РФ Силиэстийэлиир кэмитиэтин Саха сиринээҕи управлениета иһитиннэрбитинэн, холуобунай дьыаланы бастаан ис дьыала уорганнара тэрийбиттэр.
Ол эрэн, эмсэҕэлээччи кыра оҕо буоларынан, дьыала ахсынньы 12 күнүгэр Силиэстийэлиир кэмитиэт управлениетыгар бэриллибит.
Биһиги корр., «Саха сирэ» хаһыат, edersaas.ru
Хаартыска: интэриниэттэн.