Бырайыактары олоххо киллэрии, үлэни-хамнаһы кэҥэтии, сайыннарыы тиһиктээхтик салҕанарын СӨ Тас сибээскэ уонна норуоттар дьыалаларыгар миниистир Гаврил Кириллин сыллааҕы үлэ отчуотугар эттэ.
Үлэҕэ-хамнаска харгыһы коронавирус дьаҥа төһө да үөскэппитин иһин, тэтими ыһыктыбакка үлэлииллэрин миниистир бэлиэтээтэ. Маныаха ааспыт сылга далааһыннаах тэрээһиннэр ситиһиилээхтик ыытыллыбыттарын холобурдаата. Санатар буоллахха, Татарстаҥҥа Саха сирин күннэрэ үрдүк таһымнаахтык буолан ааспыттара. Маны сэргэ, III Хотугу пуорумҥа 5000-тан тахса киһи кыттыыны ылбыта. Маны сэргэ, Саха Өрөспүүбүлүкэтэ Владивостокка Илиҥҥи экэнэмиичэскэй пуорумҥа көхтөөх кыттыыны ыларын сэргэ, 35 сөбүлэһиигэ илии баттаммыта.
Национальнай-култуурунай түмсүүлэри, родовой общиналары, уо.д.а. ыкса сибээс, тиһиктээх өйөбүл баара этилиннэ. Ол курдук, ааспыт сылга национальнай түмсүүлэр 250 тэрээһини тэрийбиттэр.
«Норуоттар икки ардыларынааҕы кооперация уонна экспорт» национальнай бырайыагы олоххо киллэрии үлэ биир сүрүн хайысхатынан буолара бэлиэтэнэр. Маныаха тас эргиэн пандемия содулуттан өрүттэн эрэрэ ыйыллар. 2021 сыл түмүгүнэн, өрөспүүбүлүкэ экспортын кээмэйэ 5,7 млрд. АХШ долларыгар тэҥнэспит. Бу 2020 сыллааҕы көрдөрүүттэн 63% үрдүгэ этиллэр.
2021 сылга эрэгийиэннэр икки ардыларынааҕы сыһыаны бөҕөргөтүүгэ Крым, Татарстан, Калмыкия өрөспүүбүлүкэлэрин, Забайкалье уонна Приморье кыраайдарын, Амур уобалаһын кытары бииргэ үлэлииргэ алта сөбүлэһиигэ илии баттаныллыбыт. 2022 сылга маннык хабааннаах сөбүлэһиилэр салгыы түһэрсиллэллэрэ былааннаналлар.
Саха Өрөспүүбүлүкэтин тэрилтэлэрэ бородууксуйаларынан норуоттар икки ардыларынааҕы ырыынакка көхтөөхтүк кытталлар. Онуоха сорохтор бэйэлэрэ, сорохтор СӨ экспорты өйүүр киин өҥөтүнэн туһаналлар. Киин ааспыт сылга 26 дьоҕус уонна орто урбаанынан дьарыктанааччыларга көмөлөспүт, тирэх буолбут.
Дьон-сэргэ сүрүннээн Саха АССР 100 сылыгар, эрэгийиэннэр икки ардыларынааҕы бииргэ үлэни уонна Саха сирин табаарын киэҥ эйгэҕэ таһаарыы туһунан ыйыттылар. Миниистир Гаврил Витальевич САССР 100 сылын чэрчитинэн, 100yakutia.ru диэн официальнай саайт тэриллибитин иһитиннэрдэ итиэннэ тэрээһиннэр тустарынан манна киирэн сиһилии билсиэхтэрин сөбүн эттэ. Маны таһынан, министиэристибэ сайдыыга туһуламмыт үлэтин салгыырын, кэҥэтэрин кэпсээтэ.