“Сүтүөр ийэ” киинэ көрөөччүлэри долгутта (Видео)

Ааптар: 
Бөлөххө киир:

Уус Алдаҥҥа соторутааҕыта итинник ааттаах уус-уран киинэ таҕыста.

Бу ааҕааччыларбыт болҕомтолорун тардар айымньылардаах ааптар, хаһыаппыт доҕоро, РФ суруйааччыларын, суруналыыстарын сойуустарын чилиэнэ Татьяна Петровна Находкина суруйбут кэпсээнинэн киинэ уһуллубут.

Кэпсээн “Дьылҕаҥ бэйэҥ илиигэр” кинигэтиттэн ылыллыбыт. Т.П.Находкина кэпсээннэригэр сүрүн дьоруойдарынан үрдүкү кылааска үөрэнэр оскуола оҕолоро, эдэр ыччат, төрөппүттэр, учууталлар буолаллар. Кинилэр аныгы, дохсуннук уларыйа турар олоххо бэйэлэрин уонна төрөппүттэрин икки ардыларыгар сыһыаннара, көрсөр араас кыһалҕалара, тапталлара, тыа сирин олоҕо, үлэтэ-хамнаһа, түбүгэ-садьыга  кэпсэнэллэр. Айымньылар ааҕааччыны толкуйдаталлар, олоххо эрэл кыымын саҕаллар, оҕону, ыччаты үчүгэйгэ угуйаллар, иитэр-үөрэтэр суолталаахтар.

Киинэни Тумул бөһүөлэгин «Түмсүү» сынньалаҥ киинэ оҥорбут. “Айыллан” норуот тыйаатыра (режиссер Андрей Алексеевич Макаров) туруорбут, Альберт Николаевич Васильев таҥмыт. Тыйаатыр артыыстара бары киинэ тахсарыгар кыһамньыларын ууран, сүҥкэн кылааттарын киллэрсибиттэр. Манна даҕатан Татьяна Петровна үөрэнээччилэрэ Наталья Петровна Капитонова, Константин Иннокентьевич Петухов,  Татьяна Гаврильевна Габышева уонна оскуола үөрэнээччилэрэ Диана Андреева, Уйгулаана Пермякова оруолларын чаҕылхайдык толорбуттарын көрөөччүлэр бэлиэтииллэр. Анастасия Егоровна  Сухонина, Галина Гаврильевна  Габышева эмиэ олус бэркэ оонньоон, дьон-сэргэ биһирэбилин ылбыттар. Т.П.Находкина үөрэрэ, долгуйара улахан: «Айымньыбын дойдулаахтарым болҕомтолоругар ылан уус-уран киинэ оҥорбуттарыттан наһаа үөрдүм. Билэр дьонум, үөрэппит оҕолорум оонньообуттара үөрүүбүн хас эмэ бүк үрдэттэ. Киинэ ускуустубатын сайыннарарга тахсыылаахтык үлэлииллэригэр, “Айыллан” тыйаатыр аата киэҥник ааттанарыгар баҕарабын, эрэнэбин”, — диэтэ. “Сүтүөр ийэ” инстаграмҥа тахсар.

* * *

Татьяна Находкина — РФ үтүөлээх учуутала, СӨ үөрэҕириитин, култууратын туйгуна, С.А.Новгородов аатынан “Айар” национальнай кинигэ кыһата, тыл бэлиитикэтин сэбиэтэ тэрийэн ыыппыт күрэстэригэр 2014, 2020 сылларга “Саамай ааҕыллар кинигэлээх ааптар” анал ааты ылбыта.

Татьяна Находкина билигин айар үлэнэн утумнаахтык дьарыктанар. Кини суруйуулара ааҕааччылар болҕомтолорун тардаллар.

Хаһыаппыт доҕорун Татьяна Петровнаны кэпсээнэ киинэ буолан киэҥ эйгэҕэ тахсыбытынан итиитик-истиҥник эҕэрдэлиибит. Бөрүөҥ өссө сытыырхайдын, айар үлэҥ далааһыннаннын!

+1
0
+1
0
+1
0
+1
0
+1
0
+1
0
+1
0