Үс сыл иһигэр икки төгүл дьону ууттан быыһаабыт Илья Боягир

Ааптар: 
Бөлөххө киир:

Илья Иванович Боягир сааһын тухары тырахтарыыстаан, үрүҥ халааттаах аанньал идэлээх олоҕун аргыһа Розалия Прокопьевна Андреевалыын билигин бочуоттаах сынньалаҥҥа олороллор. Ураты кэрэ айылҕалаах Өлөөн өрүс тардыытын Батыйалаах үрэҕэр дьиэ туттан сайылаабыттара номнуо алтыс-сэттис сыла буолбут. Халлаан сылыйыыта муус устарга тиийэн баран, күһүн тымныы түһүөр диэри олороллор эбит. Кинилэр икки оҕолоохтор, түөрт сиэннээхтэр, биэс хос сиэннээхтэр.

2017 сыл бэс ыйыгар

Өлөөн эбэ мууһун ыраастанан бүтэрэн турдаҕына этэ. Уу ньууругар араас маллар устан кэлбиттэрэ. Иэдээн буолбутун тута сэрэйэн, Илья Иванович биир биэс тыла суох мотуорун собуоттаан алдьархай буолбут сирин көрдүү барбыт. Кэмниэ-кэнэҕэс номнуо тимирэн эрэр, бүтэһик күүһүнэн далбаатыыр илиини көрөн тиийбит. Очуос туһаайыытынан муустаах кэриэтэ тымныы ууттан тоҥон саҥата тахсыбат буолбут киһини ороон дьиэтигэр аҕалбыт. Розалия Прокопьевна миэдик идэлээх буолан сөптөөх суһал көмөнү оҥорбут. Эмсэҕэлээччи Афанасий Сидоров: “Күтүөппүнээн иккиэ этибит,” — диэбитин иһин, доҕорун баран көрдөөн көрбүттэр даҕаны булбатахтар. Бириэмэни сүтэрбэккэ бөһүөлэккэ тиийэн полицияҕа тыллаабыттар. Хомойуох иһин, иккис эмсэҕэлээччини кыайан өрүһүйбэтэхтэр, номнуо ууга былдьанан, көрдөөбүттэрин хаһыс да күнүгэр өлүгэ тахсыбыт…

2020 сыл балаҕан ыйын 19 күнэ

Быйыл күһүн Илья Иванович дьиэтин өрөмүөннүү сылдьан, дьон көмө көрдүүр хаһыытын истибит. Уолуйан хаалбакка, Илья Иванович мотуорун собуоттаан хаһыы хоту устубут. Дьиктитэ диэн, үс сыллааҕыта саахал тахсыбыт сиригэр икки киһи мотуордара ууга тимирэн, баахтарыттан тутуһа сылдьалларын булар. Биир-биир оротолоон дьиэтигэр аҕалан, суһал көмө кэмигэр оҥоһуллубут. Өрүс нөҥүө кытылыгар турар Харыйалаах бөһүөлэгин олохтооҕо Петр Соломонов сүүрбэччэлээх сиэнин кытта бултаан кэлэн иһэннэр мотуоркаларыгар бэнсиин кутаары, оҥочолоругар уу киирэн тиэхиньикэлэрэ тимирэн хаалбыт. Алдьархайга түбэспит дьон кураанах бэнсиин баахтарын тутан хааланнар өрүһүммүттэр. Сибээс хаппат сиригэр олорор буолан, быыһаммыт дьон хонон уоскуйан баран нөҥүө күнүгэр дойдулаабыттар.


Биһиги дьоруойбут Боягир диэн эриэккэс араспаанньатын туһунан интэриэһиргээн ыйыппыппын, кэргэнэ Розалия Прокопьевна: “Боягир диэн Ылдьаа ийэтин араспаанньата. Ийэтэ Красноярскайга баар дьэһиэй сахаларыттан төрүттээх. Кэргэним — элбэх саҥата суох, айылҕаҕа олус чугас киһи. Эспэдииссийэ кэмигэр үрэх үрдүгэр балааккаҕа күн сирин көрбүт. Боягир диэн чопчу туох суолталааҕын билбэппин”, — диэбитэ.

Илья Иванович Боягир төһө даҕаны сэттэ уончалаах буоллар сүрдээх тэтиэнэх, бэйэтин кыанар, түргэн-тарҕан туттуулаах киһи. Ону тэҥэ бэйэтин хорсун быһыытынан арбана, ыһа-тоҕо кэпсии сылдьыбат сэмэй майгылаах. Ол эрэн үс сыл иһигэр икки төгүл дьон олоҕун быыһаабыта кини туһунан элбэҕи этэр. Бу хорсун быһыыны оҥорбут саастаах киһи, хомойуох уонна соһуйуох иһин, биир кумааҕы махталы ылбатаҕа сонньутар. Бастакы түбэлтэ кэнниттэн чугас дьоно наҕараада туһунан ыйытан көрбүттэрин, үлэлээбэт биэнсийэлээхтэргэ туох да көрүллүбэтин эппиттэр. Күн сирин иккистээн көрбүт биир дойдулааҕа Афанасий күн бүгүнүгэр диэри махтала муҥура суох, өрүү көмөлөһө турар. Иккис түбэлтэ биллибэккэ хаалыан, Өлөөн улууһун “Сардаҥа” хаһыатыгар махтал сурук тахсыбытыттан билэбит.

Маннык хорсун быһыыны бэлиэтээбэт сыыһа курдук. Онон дойду дьоруойун билиниэхтээх дии саныыбын.

Надежда ИЛЬИНА, edersaas.ru

Хаартыска5а — Илья Боягир дьиэ кэргэнин кытта.

+1
0
+1
0
+1
0
+1
0
+1
0
+1
0
+1
0