Нам улууһун Фрунзе нэһилиэгэр ойуур уота ыкса кэлэн улахан куттал суоһаабыт кэмигэр, олохтоох дьаһалта тырахтарыыһа 67 саастаах Сивцев Кузьма Поселович уот инники кирбиитигэр сылдьан, минерализованнай балаһаны оҥорууга үс күннээх түүн тракторыттан түспэккэ үлэлээбитэ.
Кини ойуур уотун бохсууга хара маҥнайгыттан сылдьыбыта. Уус-Алдаҥҥа турбут уот биһиги диэки эмиэ кэлиэн сөп диэн сэрэхэдийэн олохтоох дьаһалта минерализованнай балаһаны эрдэттэн оҥорторон барбыта. Кузьма Поселович ол үлэҕэ төгүрүк суукка үлэлээн кэлэн баран саҥа аһыы олордоҕуна, ыксал буолла, тыал хайысхата уларыйан уот биһиги диэки иһэр диэн илдьит кэлэн, кини ситэ аһаабакка даҕаны эмиэ тимир көлөтүн үрдүгэр түспүтэ.
Кини эрэ тыраахтара балаһаны оҥорор анал тэриллээх этэ. Онон инники кирбиигэ киирэн үлэлээн барбыта. Күүдэпчилэнэ турар уот кытыытыгар сылдьар кырдьаҕас тырахтарыыс утуйары, сылайары, уот кутталын аахсыбакка эр санаалаахтык үс суукка эргиччи үлэлээбитэ. Ойуур уотун ыксатыгар сылдьар киһиэхэ ас-үөл кэлэрэ да күчүмэҕэйдээх этэ. Ааһан эрэр тыраахтар түннүгүнэн дьоно кыра ыһык, уу быраҕан биэрэллэрэ. Итинник үс түүннээх-күн соҕотоҕун турууласпытын кэнниттэн, нэһилиэк дьаһалтата ыксаан өссө биир тыраахтарга сир хорутар булуугу олордон көмөҕө аҕалбыта.
Үйэтин тухары тырахтарыыстаабыт хорсун үлэһит туһунан бастаан мин улуустар түмсүүлэрин сэбиэттэрин бэрэссэдээтэлэ Иван Неустроевтан истэн баран, эбии информация ылаары Фрунзе нэһилиэгин баһылыга Роман Трофимовы кытта кэпсэтэ сылдьыбытым. Онуоха Роман Дмитриевич: “Уоту утары нэһилиэк дьоно бары бииргэ турунан түүнү-күнү аахсыбакка үлэлээбиппит. Онон кини үлэтин бары көрө сылдьыбыппыт. Кузьма 67 сааһын итинник күчүмэҕэй кэмҥэ, атырдьах ыйын 9 күнүгэр, туолбутун кэнники, уот кутталын суоһа ааспытын кэнниттэн, билбиппит. Ол кэмҥэ көлөҕө олорон саастаах киһи төһөлөөх илистибитин, сылайбытын сэрэйиэххэ эрэ сөп. Ол эрээри төрөөбүт нэһилиэгим, дьонум-сэргэм, сирим-дойдум диэн санааттан итиччэлээх ыарахан кэми тулуйдаҕа. Онон нэһилиэккэ суоһаабыт уоту бохсууга кини көмөтө улахан. Билигин Кузьма Поселович ыалдьан балыыһаҕа киирэн сытар. Кини этэҥҥэ үтүөрэн, балыыһаттан түргэнник тахсарыгар баҕарабын.
Нэһилиэккэ суоһаабыт уоту бохсууга өрөспүүбүлүкэ, улуус салалталара, Фрунзе нэһилиэгиттэн төрүттээх бар дьоммут, чугастыы сытар нэһилиэктэрбит баһылыктара дьоннорун, тиэхиньикэлэрин кытта кэлэн күүс-көмө буолбуттара. Ону таһынан ас-үөл, туттар тэрил, уматык тохтоло суох кэлэ турбута. Уоту кытта охсуһар дьону түүннэри-күннэри повар кыргыттар итии минньигэс аһынан быспакка хааччыйбыттарын, итии аһы баһаар буола турар сиригэр таһан аһаппыттарын ахтыбакка хаалар сатаммат.
Уоту утары охсуһууга доброволецтар көмөлөрө муҥура суох. Кинилэр бу ыарахан кэммитигэр өрөспүүбүлүкэ араас муннугуттан кэлэн күүс-көмө буолбуттара өссө төгүл сахалар түмсүүлээхпитин көрдөрдө”, — диэн киэн тутта кэпсээнин түмүктээбитэ.
Татьяна Павлова, «Саха сирэ»хаһыат, edersaas.ru саайтка анаан