Үҥсүү суругу СӨ Судаарыстыбаннай тутууга уонна дьиэни-уоту көрөр управлениетыгар хайдах ыытыахха сөбүй?
СӨ Судаарыстыбаннай тутууга уонна дьиэни-уоту көрөр, хонтуруоллуур управлениетыгар сыл саҥатыттан дьиэлэр cөрүүннэрин, түннүктэринэн тымныы салгын күүлэйдиирин, онтон да атын хабааннаах 3 тыһыынчаттан тахса үҥсүү киирбит.
Оттук сезона саҕаланан уонна халлаан тымныйан эрэринэн үҥсүү киириитэ өсссө элбиэ турдаҕа. Ол эрээри, үҥсүүлэр олохтоохтортон бассаап ситиминэн уонна үҥсэр киһи аата-суола, олорор аадырыһа суох кэлэллэр эбит. Маннык хабааннаах үҥсүүнү тустаах судаарыстыбаннай тэрилтэ ылла да бэрэбиэркэлиир бырааба суох. «Үҥсүү социальнай ситиминэн уонна үҥсээччи аата-суола суруллубатах буоллаҕына, ону хайдах да бэрэбиэркэлиир кыахпыт суох. Сокуон быһыытынан сатаммат», — диэн СӨ Судаарыстыбаннай тутууга уонна дьиэни-уоту көрөр, хонтуруоллуур управлениетын салайааччытын солбуйааччы Павел Корнилов быһаарар.
Онон анал сурукка киһи толору аата-суола, олорор дьиэтин аадырыһа, төлөпүөнүн нүөмэрэ уонна дьиэтигэр сыһыаннаах үҥсүү сиһилии суруллубут буолуохтаахтар. Суругу куопуйалаан ылан, ugszhn@sakha.gov.ru диэн электроннай аадырыска ыытыллар. Итини тэҥэ, тустаах управление саайтыгар (https://upr-gszgn.sakha.gov.ru/) эбэтэр https://dom.gosuslugi.ru диэн ОДьКХ ГИС порталыгар киирэн эмиэ ыытыахха сөп.