Хоруона хамсыгыттан үтүөрбүт сүүстэн тахса оҕо доруобуйатын чэбдигирдиниэ.
COVID-19 дьаҥар хаптара сылдьыбыт оҕолорго Дьокуускайга «Бэс чагда» доруобуйаны чэбдигирдэргэ, сынньанарга анаан сылы эргиччи үлэлиир. Роспотребнадзор бары ирдэбилин тутуһан, күнүскү симиэнэҕэ 120 оҕо сылдьарыгар анаан, тэрилтэ салгыны ыраастыыр рециркулятордарынан, антисептиктарынан хааччыллыбыт. Симиэнэ ахсынньы 18 күнүгэр диэри үлэлиир диэн СИА иһитиннэрэр.
Киин мэдиссиинэҕэ үлэһиттэрэ чөлгө түһүү, чэбдигирии бырагырааматыгар сөпкө тыынарга араас эрчиллиилэри оҥорууну, кинезиотерапияны, кислороднай терапияны, галотерапияны, чэбдигирдэр хамсаныылары оҥорууну, о.д.а. киллэрбиттэр. «Оҕолор доруобуйа ыллыгынан сибиэһэй салгыҥҥа күүлэйдииллэр, күҥҥэ биэстэ аһыыллар, туһалаах утахтары иһэллэр. Маны сэргэ, киин баһаатайдара билиини-көрүүнү сайыннарар куурустары, оонньуулары уонна араас аралдьытар тэрээһиннэри тэрийэллэр», — дииллэр тэрийээччилэр.
Доруобуйаны чэбдигирдэр симиэнэ 14 күҥҥэ суоттаммыт. Оҕолору кэлэр симиэнэҕэ ылыы аныгыскы сылга былааннанар. Хоруона хамсыгар ыалдьа сылдьыбыт оҕолору үтүөрбүттэрин кэнниттэн, учаастактааҕы педиатр быраас көрөн ыытар.
+1
+1
+1
+1
+1
+1
+1