Үс сэлиэнньэҕэ киинэ тыйаатырдара арыллыахтара

Ааптар: 
Бөлөххө киир:

Ил Дархан Айсен Николаев оптуорунньукка РФ бырабыыталыстыбатын бэрэссэдээтэлэ Михаил Мишустин кэлэ сылдьан биһирээбит бырайыактарын кэҥэтэр, сайыннарар туһунан мунньаҕы ыытта.

Биир кэскиллээх бырайыагынан «Extra Cinema» диэн кинопроекторы тарҕатыы  буолар. Бу — киинэ тыйаатырдарыгар туруоруллар ураты систиэмэ. Биллэрин курдук, атырдьах ыйын 27 күнүгэр Арассыыйа киинэтин күнэ бэлиэтэнэр. Айсен Николаев телеграм-ханаалыгар иһитиннэрбитинэн, бу күн үс сэлиэнньэҕэ аан бастаан саҥа кинопроектордаах аччыгый киинэ тыйаатырдара арыллыахтара.

Бу сыл бүтүөр диэри өрөспүүбүлүкэ бүддьүөтүттэн өссө 7 сааланы хааччыйыахпыт. Бу бырайыак көмөтүнэн, ыраах сытар, кыра сэлиэнньэлэр олохтоохторо киинэни улахан экраҥҥа көрөр кыахтаныахтара, — диэн Ил Дархан иһитиннэрдэ.

Ону тэҥэ, мобильнай уонна көмпүүтэр оонньууларын оҥорооччуларга эмиэ өйөбүл оҥоһуллуоҕа. Айсен Николаев инновация, цифровой сайдыы министиэристибэтигэр бу уопуту Арассыыйа таһымыгар тарҕатар ньыманы оҥороллоругар сорудахтаата.

Оттон Анаабыр улууһа бу сыл бүтүөр диэри түргэн интэриниэккэ холбонуоҕа. Кэлэр сылтан Арктика атын улуустарыгар сибээс саҥа лиинийэлэрин тардан саҕалыахтара диэн СИА суруйар.

Ангелина Васильева, “Саха сирэ” хаһыат”, edersaas.ru

Хаартыска: СИА.

+1
0
+1
0
+1
0
+1
0
+1
0
+1
0
+1
0