«Үһүс саас оскуолата» билиҥҥи кэмҥэ босхо онлайн-дьарыктары ыытан, үлэлии олорор. Бу ыам ыйыттан ыытыллар дьарыктарга күн аайы 60-ча, барыта 5 тыһыынча кэриҥэ киһи сырытта.
Дьарыктары оскуола волонтердара ыыталлар. Сороҕор быраастары ыҥыран, доруобуйа туһунан кэпсииллэр. “Батсаабынан” күннээҕи араспысаанньаларын уонна сигэлэри ыыттахтарына, баҕалаахтар киирэллэр. Интэриниэтинэн, ZOOM сыһыарыынан хайдах туһанарга эмиэ үөрэтэллэр. Чэппиэр аайы Эстрада тыйаатырын артыыһа ыалдьыттыыр, ырыаларын бэлэхтиир, ыйытыыларга хоруйдуур.
Урут 42 куруһуок үлэлээбит эбит буоллаҕына, билигин 16 волонтер куруһуок ыытар. Ол курдук, ырыаҕа, үҥкүүгэ, эмтиир физкултуураҕа, оҕуруо тиһэргэ, психологияҕа, отунан эмтэнэргэ, о.д.а. үөрэниэххэ сөп.
Бу курдук, оннооҕор онлайн-ыһыаҕы, алтынньы 1 күнүгэр Кырдьаҕастар күннэрин ыыппыттара. Маннык дьарыктар аҕам саастаах дьон дьиэҕэ олорон дьарыктаах буолалларыгар, саҥаҕа үөрэнэллэригэр, үөлээннээхтэрин кытары алтыһалларыгар, санааларын көтөҕөллөрүгэр, доруобуйаларын туругун тупсаралларыгар олус туһалаахтар.
Ангелина Васильева, “Саха сирэ” хаһыат, edersaas.ru
Хаартыска: ykt.ru