Үһүс саас оскуолата алтынньыттан үлэ урукку көрүҥэр көһөрү былаанныыр. Оскуола курсаннара икки сыл кэриҥэ дьиэттэн олорон, интэриниэтинэн үөрэнэргэ күһэллибиттэрэ. Үһүс саас оскуолатыгар кэлэн дьарыктанар буоллахтарына, коронавируһу утары быһыыны ылбыт буолуохтаахтар.
Үһүс саас оскуолата сааһырбыт дьоҥҥо үөрэтэр, чэбдигирдэр, айар дьоҕуру арыйар араас туһалаах дьарыктары ыытар. Билиҥҥитэ ZOOM платформанан күннэтэ 50-ча киһи үөрэнэр. Сайын курсаннар айылҕаҕа тахсан сынньаммыттара, өрүһүнэн устууга сылдьыбыттара.
Оскуола салайааччыта Пелагея Прядезникова этэринэн, кими да быһыыны ыларга күһэйбэттэр. Ол эрээри, дьиэҕэ хаайтаран олорордооҕор, быһыыны ылан баран, араас дьарыкка сылдьар, саастыылаахтары кытары алтыһар, бэйэни сайыннарар ордугун дьон өйдүүр. Бэйэ-бэйэни харыстаһан, эппиэтинэһи ылан, ыарыы тарҕаммыт усулуобуйатыгар сөп түбэһэн олороллорун ордороллор.
Ангелина Васильева, “Саха сирэ” хаһыат, edersaas.ru
Хаартыска: Үһүс саас оскуолата.