Дойдуну көмүскүүр, нэһилиэнньэ куттала суох буолуутун хааччыйар идэ ханнык баҕарар үйэҕэ ытыктабылга сылдьар. ИДьМ биэнсийэлээҕэ, үлэ бэтэрээнэ, ССРС ИДьМ туйгуна, үс истиэпэннээх “Туйгун сулууспатын иһин” мэтээл, ИДьМ “Ытык иэскэ бэриниитин иһин” бэлиэ хаһаайына, полиция майора Алексей Никонов өрөспүүбүлүкэ бэрэсидьиэнин харабыллыыр ротаны салайан бэриниилээхтик үлэлээбитэ.
Ыспыраапка
Никонов Алексей Николаевич Нам улууһун Түбэ нэһилиэгиттэн төрүттээх. Оскуола кэнниттэн Максим Аммосов аатынан сопхуоска үлэлээн саҕалаабыта. Монголияҕа тааҥка байыаннай чааһыгар Ийэ дойдутугар ытык иэһин төлөөбүтэ.
Сатабыллаах саҕалааһын
Аармыйаҕа сулууспалаан баран, 1989-1991 сс. Дьокуускайдааҕы тыа хаһаайыстыбатын техникумугар сопхуос салайааччытын идэтин ситиһиилээхтик баһылаан, Максим Аммосов аатынан сопхуоска биригэдьииринэн үлэлээбитэ. Кэргэн ылан, уол оҕо төрөтөн баран дьоллоох Дьокуускай куоракка көһөн киирбитэ. Онно Саха Өрөспүүбүлүкэтин экология уонна айылҕа харыстабылын министиэристибэтигэр судаарыстыбыннай иниспиэктэринэн үлэлээбитэ. Милииссийэ үлэһитэ буолар дьылҕатыгар, СГУ юридическай факультетын кэтэхтэн үөрэнэн бүтэрбитэ. Дьэ, ол кэннэ, 1994 сыллаахтан анал милииссийэ ротатыгар стажерынан уһун таһаарыылаах үлэтин саҕалаабыта.
Бэрэсидьиэни харабыллыыр ротаҕа
1994 сылтан Алексей ИДьМ-гэр үлэлээн саҕалыыр. Кыһамньытын, таһаарыылаах үлэтин иһин, званиета үрдээн испитэ. Бастаан отделение хамандыыра буолбута, онтон взводу салайбыт. Сотору соҕус буолан баран, Ил Дарханы, Бырабыыталыстыба дьиэлэрин харабыллыыр рота хамандыырынан анаммыта. СӨ-тин үс бэрэсидьиэнин, Михаил Николаевы, Вячеслав Штыровы уонна Ил Дархан Егор Борисовы харабыллаабыт киһи буолар. Улахан эппиэтинэстээх үлэни кыайа-хото тэрийэр буолан, араас таһымнаах тэрээһиннэри кини ротата харабыллыыра. Сыл аайы араас таһымнаах наҕараадаларга тиксэрэ. Саха Өрөспүүбүлүкэтигэр дойду бэрэсидьиэнэ Владимир Путин, Арассыыйа премьер-миниистирэ Дмитрий Медведев уонна Уһук Илин боломуочуйалаах бэрэстэбиитэлэ Юрий Трутнев кэлэллэригэр, бэдэрээлинэй харабыл сулууспатын кытта ыкса үлэлэһэн, дойду икки бэрэсидьиэнэ Дьокуускайга куттала суох сылдьалларын хааччыйбыта.
Хомолтолоохтук күн сириттэн күрэннэ
Кини былырыын сэтинньигэ биһиги кэккэбититтэн доруобуйатынан соһуччу туораабыта. Ол эрэн, Алексей Никонов курдук холку, үлэтигэр бэриниилээх дьон хаһан да умнуллубаттар.
21 сыл устата ИДьМ-гэр үлэлээн баран, 2015 сылга бочуоттаах сынньалаҥар майор званиелаах барбыта. Үлэһит киһи биир сиргэ сыппата чахчы. Биэнсийэҕэ тахсан баран, “ОСА” ХЭТ-ҕэ харабыллааһын сулууспатын салайааччытынан үлэлээбитэ. Алексей Николаевич кэргэннээх, уол оҕолоох уонна икки кырачаан кыыс оҕо сиэннэрдээх.
Николай Попов, «Саха сирэ» хаһыат, edersaas.ru