Сомоҕолоһуу күнүнэн Өксөкүлээх Өлөксөй аатынан норуоттар доҕордоһууларын дьиэтин кэлэктиибэ бүгүҥҥү тэрээһиннэрин туһунан сырдатта.
—Бастатан туран, эҕэрдэбитин тиэрдэбит уонна Өксөкүлээх Өлөксөй аатынан норуоттар доҕордоһууларын дьиэтин сайтыгар ddnykt.ru, ютуб каналыгар, инстаграмҥа түгэнинэн туһанан подпискаланаргытыгар ыҥырабыт. Куйаар ситимнэринэн уруоктары, кэнсиэртэри көрүөххүт.
Ол курдук: «Россия- родина моя», «Подвиг во имя страны: герои народного ополчения”, ону тэҥэ «Единство народов- сила России» уонна аҕыйах ахсааннаах төрүт олохтоох хотугу норуоттар «Благословление древней земли» кэнсиэртэрин сэргиэххит. Бу тэрээһиннэри күөх экранынан ГТРК уонна «Саха» НКИХ көрдөрүөхтэрэ. Өссө бүгүҥҥү үөрүүлээх күҥҥэ ютуб каналга, сайтпытыгар, инстаграмна Национальнай культурнай холбоһуктар эҕэрдэлэрэ сүргэни көтөҕөр.
Бүгүҥҥү бэлиэ күҥҥэ «Многоликая Якутия» быыстапка болҕомто киининэн буолар. Исписэлиис Александра Старостина премьераҕа анаан «Уус Экспо» маҕаһыыны кытары сүбэлэһэн, Саха Сирин тимир уустарын бастыҥ авторскай быһахтара, батыйалара, анньыылара быыстапкаҕа туруоруллубуттарын көрбүттэр сөҕөн, хайҕаан, махтанан истиҥ тылларын тиэртилэр.
Маны сэргэ, билэргит, курдук сэтинньи 3 күнүттэн 8 күнүгэр диэри улахан этнографическай диктант буола турар. Бу хаһыс да сылын ыытыллар диктаҥҥа, чуо бүгүн, араас омуктар бэйэлэрин национальнай таҥастарын кэтэн олорон суруйбуттара көрүөхтэн кэрэ. Бүгүҥҥү үөрүү уратыта итиннэ сытар.
Күнүс инстаграм ситимин нөҥүө «Россия — это мы» патриотическай акция онлайн ыытылынна. Бу акцияҕа көхтөөх дьон үөрэ-көтө кытыннылар. Алексей Солдатов, Василий Пинигин, Нарияна Ренанто уонна ТикТок ситимигэр киэҥник биллибит хореографтар триолара тахсан эҕэрдэлээтилэр.
Бу күн өссө биир уратытынан, Өксөкүлээх Өлөксөй аатынан норуоттар доҕордоһууларын айар кэлэктиибин аатыттан Саха киинэтин историятыгар «Тыгын Дархан» киинэ бүгүн, норуоттар сомоҕолоһор күннэригэр биһиги дьиэбит «Россия» киинэ саалатыгар аан бастаан таҕыста!
Киинэттэн кылгастык сырдаттахха, сайыҥҥы куйааска, тохсунньу томороон тымныытыгар сэттэ улууһунан Саха сирин биллэр ыраах-чугас кэрэ дьикти сирдэринэн, Амматтан Дьааҥы хайаларыгар диэри, Өлүөнэ эбэ очуостарыттан Ньидьили кытыла көстүбэт эбэ ньуурдарыгар тиийэ, 200 толору декорацияҕа, 69 туос ураһа иһигэр уһуллулар. Киинэҕэ куоракка баар тыйаатырдар артыыстара бары кыттыыны ыллылар: Саха академическай драматическай тыйаатыра, Үүнэр көлүөнэ тыйаатыра, Култуура уонна ускуустуба Арктикатааҕы институтун уонна култуура кэллиэһин устудьуоннара. Массовкаҕа уопсайа 10-тан тахса тыһыынча киһи кытынна. Киинэҕэ Сахабыт сирин сылгыһыттара уустук хамсаныылары (трюктары) оҥордулар. Холобур, Улуу Чуораайытта күөлүгэр тыһыынчанан эр киһи боотур буолбута, 109 миинэр миҥэлээх түмүк сцена уһуллубута. Оттон бүгүн, Өксөкүлээх Өлөксөй аатынан норуоттар доҕордоһууларын дьиэтин улахан сценатыгар артыыстары уу харахтарынан көрөн, кинилэр кэпсииллэрин эт кулгаахтарынан истэн, дьон-сэргэ улаханнык астынна, сүргэтэ көтөҕүлүннэ, — диэн тэрээһин туһунан Өксөкүлээх Өлөксөй аатынан норуоттар доҕордоһууларын дьиэтин пресс-сулууспата иһитиннэрдэ.
