Аркадий Алексеев бирииһигэр ырыа аһаҕас күөн-күрэһин кыайыылаахтарын билиһиннэрэбит.
edersaas.ru
Атырдьах ыйын 24-25 күннэригэр Мэҥэ Хаҥалас улууһун I Тыыллыма нэһилиэгин саха норуодунай артыыһа А.М. Алексеев аатынан Култуура киинигэр биллиилээх самодеятельнай композитор, СӨ норуодунай артыыһа, Саха Өрөспүүбүлүкэтин Бочуоттаах гражданина, Арассыыйа Суруналыыстарын сойууһун чилиэнэ Аркадий Михайлович Алексеев бирииһигэр быйыл алтыс төгүлүн «Сүрэхтэр кэпсэтэр кэмнэрэ» аhаҕас ырыа күөн-күрэһэ ыытылынна.
Куонкуруска Саха сирин араас улуустарыттан барыта 22 киһи кытынна. Усулуобуйа быһыытынан, манна идэтийбит ырыаһыттар кыттыбаттар.
Бастакы күн, куонкурус маҥнайгы түһүмэҕэ буолла. Кыттааччылар иккилии ырыаны – биирэ Аркадий Алексеев ырыатын, иккиһин көҥүл тиэмэҕэ иһитиннэрдилэр. Дьүүллүүр сүбэ быһаарыытынан, финалга 15 ырыаһыт таҕыста.
Сарсыарда, күөн-күрэс иккис күнүгэр кыттааччылар саха аатырбыт атыыһыта, меценат Манньыаттаах олорбут алааһыгар экскурсияҕа сылдьан, астынан кэллилэр.
Иккис түһүмэх түмүктэринэн лауреаттар, дипломаннар быһаарылыннылар, анал ааттар иҥэрилиннилэр. Бырааһынньыктааҕы Гала-кэнсиэр, кыайыылаахтары наҕараадалааһын буолла. Дьоро киэһэни Георгий Белоусов уонна Анна Исакова сатабыллаахтык иилээн-саҕалаан ыыттылар.
Онон, билсиҥ —«Сүрэхтэр кэпсэтэр кэмнэрэ» куонкурус кыайыылаахтара!
Муҥутуур кыайыылааҕынан Чурапчы улууһун Дириҥ бөһүөлэгиттэн кэлэн ырыа күөн-күрэһигэр кыттыбыт Валерий Корякин таҕыста — Гран При хаһаайынынан буолла!
Киниэхэ 50000 солкуобайдаах сертификаты үөрүүлээх быһыыга-майгыга туттардылар. Аркадий Михайлович бу тыа сиригэр олорор-үлэлиир талааннаах ырыаһыты, мусукааны Валерий Корякины ис сүрэҕиттэн эҕэрдэлээн туран, саҥа ситиһиилэри баҕарда. Манна даҕатан эттэххэ, Валерий Егорович Аркадий Алексеев куонкуруһугар урут да ситиһиилээхтик кыттара. Бу кини Кылаан бирииһи, алҕаһаабатах буоллахпытына, иккис төгүлүн ылыыта буолар.
Леонид Винокуров, Мэҥэ Хаҥалас улууһа, I Тыыллыма нэһилиэгэ — I ст. диплом.
Афанасий Шадрин, Нам улууһа, Граф биэрэгэ – II ст. диплом.
Елена Ильина, Дьокуускай – III ст. диплом.
Екатерина Яковлева, Иннокентий Захаров, Амма улууһун Абаҕа нэһилиэгэ – “Бастыҥ дуэт” аат.
Парасковья Слепцова, Мэҥэ Хаҥалас улууһа, Табаҕа – “Ымыылаах ырыаһыт” аат.
Иннокентий Никифоров-Батас, Дьокуускай к., — “Дэгэрэҥ ырыа” аат.
Петр Сергучев, Мэҥэ Хаҥалас улууһун Хорообут с. “Иэйиилээх ырыаһыт” аат.
Николай Бандеров-Дьулуур, Орто Халыма, Ойуһардаах – “Кэскиллээх ырыаһыт” аат.
Спартак Харитонов, Хаҥалас улууһа, Покровскай к. – I Тыыллыма нэһилиэгин түмсүүлэрин анал бирииһэ.
Марфа Тарабукина, Таатта улууһа, Уус-Таатта – “Дьиэрэйэр куолас” аат.
Екатерина Яковлева, Амма улууһа, Абаҕа – Мэҥэ Хаҥалас улууһун «Дойду ситимэ» түмсүү анал бирииһэ, А.М.Алексеев анал бирииһэ.
Маны таһынан, Аркадий Михайлович биир дойдулаахтара уонна өйүүр бөлөҕө –историческай наука доктора Геннадий Толстых, СӨ үөрэҕириитин үтүөлээх үлэһитэ Дария Санникова, СӨ үөрэҕиритин үтүөлээх үлэһитэ Феврония Егорова уо.д.а. анал бириис олохтообуттарын Марфа Тарабукинаҕа туттардылар.
Татьяна АФАНАСЬЕВА, edersaas.ru