Дьокуускайга А.Е.Кулаковскай аатынан норуоттар доҕордоһууларын дьиэтигэр Чэбдигирии сылынан уонна СӨ Доруобуйа күнүнэн «Сүрэхтэн сүрэххэ» мэдиссиинэ үлэһиттэригэр махтаныы аахсыйатынан тэрээһин буолла.
Аахсыйа А.Е.Кулаковскай аатынан норуоттар доҕордоһууларын дьиэтин көҕүлээһининэн 2020 сыл ахсынньы 3 күнүттэн саҕаламмыта. Өрөспүүбүлүкэ олохтооҕо кыһыл зонаҕа үлэлиир мэдиссиинэ үлэһиттэригэр пандемия кэмигэр күүстээх, сыралаах үлэлэрин, инники кэккэҕэ сылдьалларын, эмтэнээччилэр олохторун туһугар кыһамньыларын, болҕомтолорун сыаналаан, махтал тылларын аныыр диэн норуоттар доҕордоһууларын дьиэтин пресс-сулууспатыттан иһитиннэрдилэр.
Тэрээһиҥҥэ дохсун ытыс тыаһыгар доҕуһуоллатан, «Сүрэхтэн сүрэххэ» аахсыйа дипломнара Яковлева Римма Николаевнаҕа (мэдиссиинэ киинин инфекционнай отделениетын кылаабнай бырааһа, Дьокуускай); Давыдова Светлана Николаевнаҕа (Дьокуускай куорат 3 №-дээх балыыһатын кылаабынай бырааһа); Васильев Николай Николаевичка (Дьокуускай куорат килиниичэскэй балыыһатын кылаабынай бырааһа); Дворникова Елена Витальевнаҕа (Дьокуускай куорат 2 №-дээх балыыһа, ыстаарсай медсиэстэрэ); Обутова Светлана Васильевнаҕа (3 №-дээх өрөспүүбүлүкэтээҕи килиниичэскэй балыыһа гериатрияҕа отделениетын сэбиэдиссэйэ); Кондаков Семен Николаевичка («Фтизиатрия» научнай-практическай киин» ГБТ, фтизиатр-быраас); Михаханова Ирина Владимировнаҕа (өрөспүүбүлүкэтээҕи офтальмологическай килиниичэскэй балыыһа, медсиэстэрэ); Павлова Наина Владимировнаҕа (1 №-дээх поликлиника, учаастактааҕы терапевт-быраас); Дорофеева Надежда Анатольевнаҕа (өрөспүүбүлүкэтээҕи 2 №-дээх балыыһа — мэдиссиинэ суһал көмөтүн оҥорор киин, экспедитор); Этигясов Михаил Михайловичка (өрөспүүбүлүкэтээҕи килиниичэскэй балыыһа анестезиологияҕа уонна реанимацияҕа отделениета, младшай медбрат); Эверстова Саргылана Ивановнаҕа (Дьокуускай куорат 3 №-дээх балыыһата, күнүскү стационар сэбиэдиссэйэ) туттарыллыбыттар.
«Сыралаах үлэҕитин, болҕомтоҕутун сыаналаан туран, махтал тылларын аныыбыт. Эһиги тулуургут, кыһамньыгыт, истиҥ, амарах сыһыаҥҥыт эмтээҕэр ордук. Маннык үтүө санаалаах дьон баара — дьол. Эһиги — биһиги кэммит дьоруойдараҕыт!» диэн ис сүрэхтэн тыллан тахсар махтал тылларын анаабыттар. Үөрүүлээх, долгутуулаах аахсыыйаны «Служба 02» ырыа кэлэктиибэ (уус-уран салайааччы СӨ култууратын үтүөлээх үлэһитэ Юта Асекритова), «Сюрприз» эстраднай үҥкүү норуодунай ансаамбыла, «Ярилов день» үҥкүү норуодунай ансаамбыла (уус-уран салайааччы СӨ култууратын үтүөлээх үлэһитэ Ирина Егорова), Василий Пинигин СӨ Филармония солиһа, «Тетрис» үҥкүү норуодунай ансаамбыла (уус-уран салайааччылар СӨ култууратын туйгуннара Татьяна Савочкина-Матюшенко, СӨ култууратын үтүөлээх үлэһитэ Тамара Савочкина) ситэрэн-хоторон, ырыаларынан, үҥкүүлэринэн киэргэтэн биэрдилэр.
Хаартыскалар Айталина Аргунова түһэриилэрэ