Муус устар 21 күнүгэр, Дьокуускайга Сүрэх-тымыр киинэ аһыллыан иннинэ, научнай-бырактыычаскай сэминээр ыытылынна.
edersaas.ru
«Мэйиигэ хаан эргииригэр сытыы кэһиллиилэри эмтииргэ саҥа технологиялар» диэн брифинг-сэминээр быһыытынан ыытыллыбыт тэрээһин биир уратытынан Сүрэх-тымыр саҥа киинин киэҥ-куоҥ, аныгы кэмпэриэнсийэлиир саалатыгар биир бастакынан ыытыллыбыта буолла.
Тэрээһин сыала-соруга — өрөспүүбүлүкэ улахан мэдиссиинискэй тэрилтэлэрин салайааччыларын, быраактык-учуонайдары уонна инсуллаах ыарыһахтары кытары суһал анал мэдиссиинискэй көмөнү оҥоруунан дьарыктанар, доруобуйаны чөлүгэр түһэрэр исписэлиистэр көрсүһүүлэрин тэрийии.
Билигин инсульт өлүү көрдөрүүтүгэр сүрүннүүр миэстэни уонна нэһилиэнньэ инбэлииккэ тахсыытыгар бастакы миэстэни ылар. Кэнники сылларга биһиги өрөспүүбүлүкэбитигэр мэйиигэ хаан эргиирэ сытыытык кэһиллиититтэн ыалдьыы, өлүү-сүтүү улаатара бэлиэтэнэр. Ол иһин, биһиги эспиэрт-кылаастаах аныгы мэдиссиинискэй тэриллэринэн сэбилэнэр, үрдүк мэдиссиинискэй технологиялаах көмөнү оҥорор анал Киини тутуу демография балаһыанньата уонна ыарахан ыарыы кэнниттэн өрүттүбүт киһи олоҕун хаачыстыбата тупсалларыгар эрэнэбит.
Көрсүһүүгэ сүрүннээн мэдиссиинискэй көмөнү оҥоруу тэрээһин боппуруостарын дьүүллэстилэр. Кинилэр бэлиэтээн эппиттэринэн, ыарыыны бастакы сүһүөх сэрэтии, доруобуйаны түһүмэҕинэн биир кэлим чөлүгэр түһэрии, ыарыыны иккис сүһүөх сэрэтии курдук соруктар үрдүк таһымнаахтык толорулуннахтарына эрэ, ылыллыбыт сыал-сорук туолар кыахтаах.
Саалаҕа сэминээргэ 28 киһи кытынна, онтон өрөспүүбүлүкэ араас улуустарыттан 52 исписэлиис холбосто.
СӨ Доруобуйа харыстабылын министиэристибэтин штаты таһынан кылаабынай невролога Татьяна Николаева иһитиннэрбитинэн, инсулу сэрэтэргэ ыарыы кутталлаах түгэннэрин утары охсуһуохха, диспансеризацияны күүһүрдүөххэ, теле-мэдиссиинэ технологиялара уонна ыарыһахтар туруктарын ыраахтан мониториннааһын табыгастаах буолалларын хааччыйыахха наада.
Суһал мэдиссиинискэй көмө ыстаансыйатын кылаабынай бырааһа Татьяна Андросова Дьокуускай куоракка уонна куорат таһынааҕы сэлиэнньэлэргэ ыарыһахха тиийэр бириэмэ ортотунан 20 мүнүүтэҕэ тэҥнэһэрин туһунан эттэ. Инсульга сыһыаннаан суһал мэдиссиинискэй көмө ыстаансыйатыгар сылга 2159 ыҥырыы киирэр, массыыналары сэбилээһин уонна үлэ усулуобуйата сылтан сыл аайы тупсар.
Мунньахха ону таһынан Саахал мэдиссиинэтин өрөспүүбүлүкэтээҕи киинин кылаабынай бырааһын солбуйааччы Наталья Слепцова эппитинэн, Тымыр эрэгийиэннээҕи киинигэр уонна тымыр бастакы сүһүөх отделениеларыгар сылга 389 инсуллаах ыарыһах аҕалыллар. Кини мустубут дьоҥҥо санитарнай авиация үлэтин тэрийиини уонна өрөспүүбүлүкэ киэҥ нэлэмэн сиригэр-уотугар көрсөр кыһалҕаларын кэпсээтэ.
Салҕыы Өрөспүүбүлүкэтээҕи 2 №-дээх балыыһа реанимацияҕа отделениетын сэбиэдиссэйэ Елена Им, отделение наукаҕа сүбэһитэ Саргылана Чугунова, бу балыыһа РХМДЛ отделениетын сэбиэдиссэйэ Владимир Дохунаев, Мэдиссиинэ национальнай киинин неврологияҕа отделениетын сэбиэдиссэйэ Нина Васильева инсульт туһунан тустаах дакылааттары оҥордулар.
Уопсайынан,билигин бырактыычаскай доруобуйа харыстабылыгар турар сытыы боппуруостары дьүүллэстилэр.
Брифинг-сэминээр бүтүүтэ Өрөспүүбүлүкэтээҕи 1 №-дээх балыыһа-Мэдиссиинэ национальнай киинин генеральнай дириэктэрэ Станислав Жирков биһиги өрөспүүбүлүкэбит нэһилиэнньэтин доруобуйатын туругун тупсарарга ыарыһаҕы кэмигэр уонна хаачыстыбалаахтык эмтииргэ Мэдиссиинэ национальнай киинин салалтата наадалаах усулуобуйалары тэрийиэҕин, дьоһуннаах уонна наадалаах көҕүлээһиннэри өйүөҕүн туһунан эттэ.
«Саха сирэ», edersaas.ru сайтка анаан Сардаана СТАРКОВА (Мэдиссиинэ национальнай киинин пресс-сэкирэтээрэ), Надежда ЕГОРОВА.