Сүрэх-тымыр киинин исписэлиистэрэ аныгы тэриллэргэ үлэлииргэ бэлэмнэр
Саха сирин киин куоратыгар Дьокуускайга сотору Уһук Илинҥэ саамай аныгы киин — сүрэх-тымыр киинэ аанын арыйыаҕа.
edersaas.ru
Киин сүрүн соругунан ыарыы таһымын аҕыйатарга былааннаммыт үлэни тэрийии буолуоҕа.
Саҥа киин сүрэх-тымыр ыарыылаахтарга мэдиссиинискэй көмөнү оҥоруу хаачыстыбатын тупсарарга көмөлөһүөҕэ.
Киин аан дойду стандартыгар эппиэттиир мэдиссиинискэй көмөнү оҥорорго флагманскай тэриллэринэн, ол иһигэр эндоваскулярнай технологиянан, сэбилэннэ. Сүрэх-тымыр өрөспүүбүлүкэтээҕи киинигэр суһал аортокоронарнай шунтирование оҥоһуллар буолуоҕа, маннык шунтирование өрөспүүбүлэкэҕэ туһанылла илигэ.
Киин сүрүн соруга -– сүрэх-тымыр ыарыыларыгар оҥоһуллар мэдиссиинискэй көмө табыгастаах буолуутун уонна хаачыстыбатын тупсарыы.
Мэдиссиинэ национальнай киинин пресс-киинэ иһитиннэрбитинэн, бу тэрилтэҕэ сүрүнэ -– эркиннэр буолбакка, исписэлиистэр. 2022 сыл олунньутугар Өрөспүүбүлүкэтээҕи 1 №-дээх балыыһа—Мэдиссиинэ национальнай киинин генеральнай дириэктэрэ Станислав Жирков Москваҕа оробуочай сырыытын кэмигэр Н.П.Склифосовскай аатынан научнай-чинчийэр институт дириэктэрэ, мэдиссиинискэй наука дуоктара, бэрэпиэссэр Сергей Петриковтыын көрсүбүтэ.
Көрсүһүү түмүгүнэн Н.П.Склифосовскай аатынан научнай-чинчийэр институт базатыгар тымыр эрэгийиэннээҕи киинигэр каадырдары бэлэмниир туһунан сөбүлэһии түһэрсиллибитэ. Бастакы түһүмэх кулун тутар 11-25 күннэригэр Москваҕа хайыы үйэ үөрэннэ. Каадырдары бэлэмниир бырагыраама биһиги исписэлиистэрбит инфаркт уонна инсульт куораттааҕы ситимин сүрүн киинигэр үөрэнэр улахан кыаҕы биэрэр. Ону таһынан Мэдиссиинэ национальнай киинэ научнай-методическай уонна бырактыычаскай дьарыктардаах, бу ыарыһахтары эмтииргэ үрдүк көдьүүстээх түмүктэр ылылларыгар төһүү күүһүнэн буолуоҕа.
Манна даҕатан эттэххэ, биһиги исписэлиистэрбит Сүрэх-тымыр саҥа киинигэр номнуо туруоруллубут аныгы флагманскай тэрилгэ үлэлииргэ бэлэмнэр.
Кулун тутар ортотуттан Сүрэх-тымыр киинин үлэһиттэрин саҥа тэриллэри туһанарга үөрэтэргэ Кииҥҥэ мэдиссиинискэй тэриллэрэ туруоруллубут хампаанньалар (Москваттан, Санкт-Петербургтан уо.д.а. киин куораттартан) бэрэстэбиитэллэрэ ыҥырыллыбыттара. Мэдиссиинэ национальнай киинин Станислав Жирков (өссө инновацияларга дириэктэри солбуйааччынан үлэлии сылдьан) салайааччылаах дьаһалтата каадыры бэлэмнээһин стратегиятын сыл инниттэн оҥорбута.
Онон, Мэдиссиинэ национальнай киинин саҥа подразделениеларын кыахтара аныгы килииникэ саамай үрдүк ирдэбиллэригэр эппиэттииллэр — биһиги киэҥ-куоҥ өрөспүүбүлүкэбит саамай ыраах сытар оройуонуттан саҕалаан, киин куорат хас биирдии олохтооҕор тиийэ табыгастаах буолуоҕа.
Надежда ЕГОРОВА, «Саха сирэ» хаһыат , edersaas.ru
Мэдиссиинэ национальнай киинин пресс-сулууспатын хаартыскалара