Доруобуйа Сүрүн

Сүрэх-тымыр киинин дойдуга биир бастыҥынан билиннилэр

Соторутааҕыта үлэҕэ киллэриллибит Сүрэх-тымыр саҥа киинэ хайыы үйэ  эмтэнээччилэри көрөн-истэн, эпэрээссийэлэри оҥорор. Эрдэ суруйбуппут курдук, Киин  өрөспүүбүлүкэ эрэ буолбакка, Уһук Илин кэккэ эрэгийиэннэрин  эмтэнээччилэригэр мэдиссиинискэй көмөнү оҥоруоҕа.

Бу туһунан СӨ Ил Дархана Айсен Николаев  “Саха” ГТРК биэриитигэр иһитиннэрдэ.

Айсен Николаев:

“Квоталар Арассыыйа Федерациятын  Доруобуйатын харыстабылын министиэристибэтин нөҥүө тыырыллыахтаахтар. Саха сирин эмтэнээччилэрэ эпэрээссийэлэнэллэригэр (үрдүк технологиялаах)  квотаны 1,5-2 төгүл улаатыннаралларын курдук, ити боппуруоһу хайыы үйэ туруордубут. Сүрэх-тымыр киинэ аһыллан, биһиги быраастарбыт тымырга уонна сүрэххэ эпэрээссийэлэри оҥорор кыахтаахтар”, — диэн эттэ.

РФ доруобуйатын харыстабылын миниистирэ Михаил Мурашко  Саха сиригэр Киин аһыллыытыгар кэлэ сылдьан,  мэдиссиинискэй сулууспалар сайдыыларын боппуруостарыгар мунньаҕы ыыппыта. Айсен Николаев санатан эппитинэн, РФ миниистирэ  үрдүк технологиялаах мэдиссиинискэй көмөнү атын эрэгийиэн дьонугар эмиэ оҥоруохтаахтарын туһунан бэлиэтээбитэ. Ону таһынан  Сүрэх-тымыр киинин мэдиссиинискэй тэриллэрин сэбилээһиҥҥэ Саха сирин бырабыыталыстыбатын уонна эмчиттэрин үлэлэрин үрдүктүк сыаналаабыта.

Надежда ЕГОРОВА, «Саха сирэ», edersaas.ru

0
0
Telegram @edersaas20