От ыйын 1 күнүгэр Дьокуускайга Сүрэх-тымыр киинигэр мэйиигэ хаан эргиирэ кэһиллиилээх ыарыһахтарга неврология отделениета аһылынна.
edersaas.ru
Отделение Саха сирин олохтоохторугар анал суһал көмөнү оҥорор аналлаах. Саха сиригэр кэнники сылларга бу ыарыы элбээһинэ уонна өлүү ахсаана улаатара бэлиэтэнэр. Ол да иһин, СӨ Бырабытаалыстыбата уонна Доруобуйа харыстабылын министиэристибэтэ эксперт-кылаастаах, эпэрээссийэлиир саалалардаах, үрдүк таһымнаах каадырдардаах аныгы Киини тутарга быһаарыныылара сотору кэминэн демография балаһыанньатын, инсульт кэннинээҕи олох хаачыстыбатын тупсарыаҕа.
Билигин Киин 5-с этээһигэр олохсуйбут неврология отделениета үлэтин 24 неврология уонна 6 реанимация куойкалардаах саҕалаата. Сырдык уонна киэҥ-куоҥ көрүдүөрдэр, иккилии миэстэлээх палааталар (хас биирдии палаата туһунан санузеллаах), мөлтөхтүк көрөр дьоҥҥо ыйар бэлиэлэр уо.д.а. эмтэнээччилэргэ уонна үлэһиттэргэ табыгастаах буолуоҕа.
Инсулу быһаарыы уонна эмтээһин боппуруостарыгар Хотугу сир оройуоннарын кытары суукканы быһа теле-мэдиссиинэ көмөтүнэн сүбэ-ама биэриэхтэрэ. Туох эрэ ураты мэдиссиинискэй көрдөрүү баар буоллаҕына, невролог-быраастары кытары сөбүлэһии кэнниттэн ыарыһаҕы суһаллык үрдүк мэдиссиинискэй көмөнү оҥорор отделениеҕа аҕалыахтара. Отделение ону таһынан инсуллуур кутталлаахтарга киирсэр дьону кытары үлэлиир, кэмигэр оҥоһуллубут хирургия көмөтө инсулу сэрэтиэн уонна олоҕу быыһыан сөп.
Неврология отделениетыгар уопуттаах, үрдүк таһымнаах невролог-быраастар, нейрохирурдар, рентгенэндоваскулярнай хирурдар, УЗИ, КТ уонна МРТ аппарааттары баһылаабыт исписэлиистэр уонна мультидисциплинарнай реабилитационнай хамаанда талыллан үлэлииллэр. Неврология отделениетын — үрдүк категориялаах невролог-быраас, мэдиссиинискэй наука хандьытаата Нина Васильева, нейрореанимационнай отделениены анестезиолог-реаниматолог, СӨ доруобуйатын харыстыбалын туйгуна, үрдүк категориялаах быраас Любовь Никифорова салайаллар.
Надежда ЕГОРОВА, «Саха сирэ», edersaas.ru