СӨ Үөрэҕин уонна наукатын миниистирэ Владимир Егоров дириэктэрдэри кытта көрүстэ
Быйылгы атырдьах ыйынааҕы үөрэх үлэһиттэрин мунньаҕа урукку сыллардааҕар уратыта үгүс. Олортон биирдэстэринэн СӨ Үөрэҕин уонна наукатын миниистирэ улуустааҕы үөрэх управлениетын начальниктарын, орто профессиональнай үөрэх, оскуола дириэктэрдэрин кытта көрсүһүүтэ буолар.
Көрсүһүүгэ үлэ сүрүн хайысхаларын олоххо киллэрии соруктарын уонна механизмын быһаарыстылар, кыһалҕалары кэпсэттилэр, ыйыы-кэрдии ыллылар, санааларын этиннилэр. Мунньахха миниистири солбуйааччылар бары кытыннылар. Онон бүгүҥҥү күҥҥэ баар кыһалҕалары, үөрэх эйгэтин сонуннарын, саҥа уйларыйыылары барытын ырытыстылар. Миниистир маҥнайгы күн оскуола дириэктэрдэрин кытта көрүстэ. Манна кини эһиил Дьокуускай куоракка ыытыллыахтаах норуоттар икки ардыларынааҕы Интеллектуальнай оонньуу презентациятын көрдөрдө итиэннэ “Айдарыылаах оҕолор” бырайыак туһунан кэпсээтэ. Ол курдук, Оонньуу чэрчитинэн араас кэмпириэнсийэлэр, олимпиадалар, “төгүрүк остуоллар”, наука быыстапката, лиэксийэлэр, маастар-кылаастар, технологическай шоу (IT-Хакатон, 3 D, роботтар оонньуулара), о.д.а. тэрээһиннэр былааннаналлар. Уопсайа 1500 кэриҥэ оҕо кыттара биллэр.
Итини сэргэ “Ил Дархан” диэн ааттаах үөрэх ситимин судаарыстыбаннай тэрилтэлэрэ тэриллэллэрин, балаһыанньата оҥоһулла сылдьарын туһунан иһитиннэрдэ. Бу аҥардас интеллектуальнай эрэ сайдыылаах оҕолору өйүүр сыаллаах буолбакка, айар үлэҕэ, спорка о.д.а. эйгэҕэ айдарыылаах оҕолору сайыннарар сыалтан оҥоһулларын эттэ. Итиэннэ 2019 сылтан үлэтин саҕалыахтаах норуоттар икки ардыларынааҕы Арктика оскуолатын туһунан кэпсээтэ.
Салгыы Өктөмнөөҕү үөрэх киинин дириэктэрэ Юрий Семенов үөрэх салайааччыларын түмсүүтүн тэрийиэххэ диэн этии көтөхтө. Дириэктэр бу этиитин үгүстэр өйүүллэрин биллэрдилэр.
Онтон Чурапчы орто оскуолатын дириэктэрэ Михаил Дьячковскай миниистиртэн Арассыыйатааҕы үөрэх уонна наука миниистирэ Ольга Васильева соторутааҕыта биэрбит кэмпириэнсийэтин туһунан туоһуласта. Чопчулаан эттэххэ, тэрийээччини (учредитель) уларытыы, үөрэх үлэһиттэрин тургутан көрүү (тестирование), астрономия биридимиэтэ киириитин, омук тылыгар эксээмэн туттарыы туһунан ыйыталаста. Манна барытыгар миниистир сиһилии хоруйдары биэрдэ.
Иккис күн миниистир орто профессиональнай үөрэх тэрилтэлэрин дириэктэрдэрин кытта көрүстэ. Тустаах мунньахха хоруупсуйа, үп-харчы, быйылгы үөрэх дьылыгар бэлэмнэнии, инклюзивнай үөрэхтээһин туһунан кэпсэттилэр. Профессиональнай үөрэх кыһаларыгар уопсайа 18 тыһ кэриҥэ сайабылыанньа киирбит. Ордук куонкурус алын кылаас уонна физкультура учууталларын, иитээччи идэтигэр эбит. Онтон оробуочай идэлэр ортолоругар сайабылыанньаларын автомеханик, электромонтер, сварщик идэтигэр хото биэрбиттэр. Абитуриеннар ордук Дьокуускайдааҕы медицинскэй кэллиэскэ, Дьокуускайдааҕы тыа хаһаайыстыбатын техникумугар, Дьокуускайдааҕы финансовай-экономическай кэллиэскэ үөрэниэхтэрин баҕараллар эбит.
Киэҥ далааһыннаах кэпсэтии улуус баһылыктарын социальнай боппуруостарга солбуйааччыларын, үөрэх управлениетын начальниктарын кытта таҕыста. Миэстэтигэр үөрэх салаатыгар кинилэр эппиэттиир буолан, министиэристибэ бэйэтин өттүттэн үгүс ыйыы-кэрдии, сүбэ-ама биэрдэ, иһитиннэрии оҥордо. Холобура, норуоттар икки ардыларынааҕы Интеллектуальнай оонньууларга оҕолору кытыннарыы, Ил Дархан оскуолаларын ситимин, быйылгы үөрэх дьылыгар бэлэм, биир кэлим эксээмэн түмүгүн, оскуолалары биир симиэнэҕэ көһөрүү, үөрэх литэрэтиирэтинэн хааччыйыы, төрөөбүт тылы үөрэтии, сайыҥҥы сынньалаҥы тэрийии, о.д.а. боппуруостары таарыйдылар.
Ити курдук, СӨ Үөрэҕин уонна наукатын миниистирэ Владимир Егоров быйылгы атырдьах ыйынааҕы мунньахха үөрэх управлениетын начальниктарын, дириэктэрдэри кытта көрсүһүүтэ улахан көдьүүстээхтик ааста.
Людмила ПОПОВА, “Саха сирэ” хаһыат, edersaas.ru