СӨ Үөрэҕин уонна наукатын миниистирэ Михаил Сивцев Билии күнүнэн эҕэрдэлиир
Убаастабыллаах учууталлар, төрөппүттэр, оҕолор уонна устудьуоннар! СӨ Үөрэҕин уонна наукатын министиэристибэтин уонна тус бэйэм ааппыттан саҥа үөрэх дьылынан эҕэрдэлиибин!
edersaas.ru
Быйыл үөрэх саҥа усулуобуйаҕа, ол да буоллар, өрөспүүбүлүкэбит бары үөрэҕин кыһаларыгар саҕаланар.
Биһиги маннык усулуобуйаҕа үөрэннибит уонна эһигини кытта бу быстах кэмнээх уустуктары туоруурга бэлэммит, хамсык дьаҥа сотору уостарыгар эрэнэбин.
Күндү доҕоттор, балаҕан ыйын 1 күнэ — улахан суолталаах, инники олох суола арыллар уонна саҥа түһүмэҕэ саҕаланар бэлиэ күн.
Оскуолатааҕы сыллар, устудьуоннуур кэмнэр хас биирдиибитигэр умнуллубат арыйыылары, саҥа сүүрэннэри бэлэхтииллэр. Быйыл 15 285 оҕо аан бастакытын оскуола боруогун атыллыаҕа.
Убаастабыллаах педагогтар уонна үөрэх салаатын үлэһиттэрэ, сыралаах уонна бэйэҕитин харыстаммакка үлэлиир кыһамньыгыт иһин махтанабын. Эһиги уустук эрээри, саамай ирдэнэр уонна суолталаах идэни талбыкыт. Эһиги баар буолаҥҥыт үгүс, дьоһуннаах көлүөнэ үүнэн тахсар.
Күндү үөрэнээччилэр уонна төрөппүттэр! Кимнээҕэр ордук үөрэх дьылын эһиги күүттүгүт. Саҥа үгүс билиини иҥэринэргитигэр, интэриэһиргээн туран үөрэнэргитигэр, оскуолатааҕы көрдөөх дьарыктары баҕарабын. Оскуолатааҕы сыллар саамай умнуллубат бэлиэ күннэр. Төрөппүттэргэ саҥа үөрэх дьылыгар тулууру баҕарабын.
Күндү маҥнайгы кылаас үөрэнээччилэрэ! Быйылгы сылтан олоххутугар “оскуолатааҕы сыллар” диэн саҥа кэрдиис кэм саҕаланар. Бу кэрэ сыллар хас биирдии түгэннэрин сыаналыыргытыгар баҕарабын. Кыра даҕаны түгэннэр тиһиллэн олохпут тухары умнуллубат өйдөбүл буолан хаалаллар.
Убаастабыллаах устудьуоннар, устудьуоннуур сыллар саамай кэрэ кэмнэр. Манна сыллата иҥэриммит билиибитин олохпутугар туһанабыт. Бастыҥ доҕотторбутун көрсөбүт, аан маҥнайгытын суолталаах быһаарыныылары ылынабыт. Бу эдэр саас умнуллубат бэлиэ сыллара буоллуннар. Олоххут суолун уонна онно аргыс оҥостор дьоҥҥутун буларгытыгар баҕарабын.
Билии күнүнэн! Саҥа үөрэх дьылынан!
СӨ Үөрэҕин уонна наукатын миниистирэ Михаил Сивцев.