«Үөрэхтээһин уонна Култуура» — маннык ааттаах социальнай үөрэхтээһин бырайыагын толкуйдаан, Саха сирин үс үрдүк үөрэҕин кыһаларын преподавателлэрэ уонна устудьуоннара ректордарын кытта «Халыма» федеральнай айан суола ааһар улуустарынан сылдьаллар.
edersaas.ru
Үрдүк үөрэх кыһаларын десаана бэйэлэрин үлэлэрин Өймөкөөн улууһун Томтор нэһилиэгин Ньукулай Чысхаан аатынан орто оскуола үөрэнээччилэрин кытта көрсүһүүттэн саҕалаата. Үрдүкү кылаас оҕолоругар математикаҕа, биологияҕа, физикаҕа, култуура уонна искусство, физкультура уонна спорт хайысхаларыгар консультация биэрдилэр. Тэрээһиҥҥэ 100-тэн тахса үөрэнээччи кытынна. «Кэскилгэ айан» диэн оскуола оҕолоругар уонна олохтоох ыччаттарга интерактивнай оонньууну ыыттылар.
Онтон Өймөкөөн нэһилиэгэр тиийэн «Өймөкөөнү — Арктикаҕа!» диэн флешмобка кытыннылар.
Суолталаах тэрээһин — АГИКИ профессора, социологическай наука доктора Ульяна Винокурова уонна Өймөкөөн улууһун култуураҕа Управлениетын салайааччыта Аксинья Сивцева араас хайысхаҕа бииргэ үлэлээһиннэрин түмүгэ. Бу икки айылҕаттан айдарыылаах дьон Тымныы полюһа Өймөкөөн сайдыытыгар туһуламмыт кэскиллээх былааннарын, сонунтан сонун толкуйдарын салгыы олоххо киллэрэн иһиэхтэрэ.
Биллэн турар, суолталаах хардыынан Өймөкөөн улууһун муниципалитетын баһылыга Михаил Захаровы кытта федеральнай үс үрдүк үөрэх кыһатын ректордара Саргылаана Игнатьева (АГИКИ), Иван Слепцов (Тыа хаһаайыстыбатын академията) уонна Иннокентий Готовцев (Чурапчытааҕы физкультурнай институт) бииргэ үлэлээһиҥҥэ Сөбүлэҥ түһэрсиилэрэ буолла.
Үөрэхтээһин десана ханна сылдьыбыт сиригэр барытыгар толору киһи мустубут кулууптарыгар олохтоох нэһилиэнньэни кытта көрүстэ.
Бастакы сүрэхтиинэлэрэ табыллан, үөрэхтээһин десаанын кыттыылаахтара Томпо улууһугар айаннатан тиийэн, аны Хаандыгатааҕы геология техникумун устудьуоннарын кытта көрүстүлэр. Онтон Кэскил, Кириэс Халдьаайы, Мэҥэ Алдан нэһилиэктэригэр сылдьан, кэскиллээх былааннарын олоххо киллэрдилэр.
Олунньу 8 күнүгэр үрдүк үөрэх кыһаларын десаана Таатта улууһугар кэлэн, улуус баһылыга Михаил Соровы кытта көрсөн, бииргэ үлэлээһиҥҥэ Сөбүлэҥ түһэристилэр. Онтон Уолбаҕа, Дэбдиргэҕэ, Чөркөөххө, Чымынаайыга, Чычымахха, Харбалаахха сылдьан бырайыактарын хайысхаларынан үлэлээтилэр. Үөрэхтээһин десаана олунньу 10 күнүгэр диэри аны Чурапчы улууһун нэһилиэктэринэн сылдьыаҕа.
Кулун тутар 25 күнүгэр АГИКИ, Тыа хаһаайыстыбатын академията уонна Чурапчытааҕы физкультурнай институт — үс федеральнай үрдүк үөрэх кыһалара Суорун Омоллоон аатынан Опера уонна балет тыйаатырыгар өрөспүүбүлүкэ оскуолаларын выпускниктарын кытта көрсүһүөхтэрэ, салгыы кэскиллээх бииргэ үлэлээһин тосхолун торумнуохтара.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа Күннэй Сивцева, Павлина Васильева түһэриилэрэ.