Доруобуйа Сүрүн Уопсастыба

Сүрүн болҕомто миэдиктэртэн ноҕуруусканы устууга ууруллар

Коронавируснай инфекцияны бохсууга өрөспүүбүлүкэтээҕи суһал ыстаап уочараттаах мунньаҕар Айсен Николаев саҥа сорудахтары биэртэлээтэ. Ол курдук, улуустар дьаһалталарыгар, суһал ыстааптарыгар бары күүһү түмэн, миэдиктэри туох ирдэнэринэн — тырааныспарынан, эминэн-томунан, волонтер көмөтүнэн, о.д.а. хааччыйарга сорудахтаата.

“Бэһис долгуҥҥа” улахан ноҕурууска поликлиникаларга, киин балыыһаларга, учаастактааҕы амбулаторияларга сүктэрилиннэ. Элбэх киһи ыалдьан, миэдиктэр олус ноҕуруускалаахтык үлэлииллэр. Үгүс дьон чэпчэкитик ыалдьаллар, балыыһаҕа киирии аҕыйах, ол эрээри бырааһы ыҥырыы, поликлиникаҕа көрдөрүнүү хас да төгүл элбээтэ. Амбулаторнай эмтэниигэ дьон босхо эминэн хааччыллыахтаахтар, миэдиктэр харгыһа суох үлэлиэхтээхтэр, ол иһин ноҕуруускаларын кыччатарга болҕомто ууруллуохтаах, — диэн Ил Дархан эттэ.

Онон улуустааҕы суһал ыстааптар үлэлэригэр сүрүн болҕомтону дьону бастакынан көрөр-истэр миэдиктэр үлэлэрин күүһүрдүүгэ ууруохтаахтар. Баһылыктар поликлиникаларга төһө уочарат баарын кэмигэр истэн-билэн, миэрэлэри ылыныахтаахтар, кэлиини-барыыны хонтуруолга тутуохтаахтар. Ону тэҥэ, төһө киһи ыалдьарын-үтүөрэрин кэтээн көрөн, эминэн, саппаас куойканан хааччыйыахтаахтар. Элбэх дьону анаалыстаан, туох да сибикитэ суох ыалдьа сылдьар эрээри, ыарыыны тарҕатааччылары булан, харантыыҥҥа ыытыахтаахтар.

Ыалдьыбыт киһиэхэ кэлбит мэдиссиинэ биригээдэлэрэ дьиэлээхтэртэн барыларыттан анаалыс ылыахтаахтар. Хат дьахталлар поликлиникаҕа көрдөрө кэллэхтэринэ, булгуччу “ковидка” анаалыс туттарыахтаахтар.

Роспотребнадзор” дааннайынан, Дьокуускай куораттан ураты, Мэҥэ Хаҥаласка ыалдьыы элбээн эрэр (суукка иһигэр 148 киһи). Уус Алдаҥҥа, Алдаҥҥа, Тааттаҕа, Үөһээ Бүлүүгэ эбиллэн эрэрэ дьиксиннэрэр.

Билигин реанимацияҕа 78 киһи сытар, ол иһигэр 1 оҕо. Кинилэртэн 14 киһи ИВЛ аппарааттаах сытар. Кинилэр быһыыны ылбатах буолан, ыараханнык ыалдьаллар. Оҕолор ыалдьаллара икки төгүл элбээтэ. Ыалдьыбыт дьон уопсай ахсааннарыттан 30%-ра – оҕолор. Онон коронавируһу утары быһыыны ыларга ыҥыраллар. Өрөспүүбүлүкэҕэ улахан дьон 79,2%-ра быһыы бастакы укуолун ылбыттар. Чурапчы, Нерюнгри, Нам улуустарыгар 70%-ны куоһара иликтэр.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru

0
0
Telegram @edersaas20