Чэпчэки атлетикаҕа норуоттар икки ардыларынааҕы успуорт маастара Надежда Гоголева суукканан сүүрүүгэ Арассыыйа чөмпүйэнээтигэр үрүҥ көмүс мэтээли ылары ситистэ. Сүүрүүк кыыс 24 чаас устата 245 км уһуну сүүрдэ.
Уус Алдантан төрүттээх Надежда Гоголева күрэхтэһии туһунан санаатын биһиги саайтпыт ааҕааччыларыгар анаан маннык үллэһиннэ:
— Суукканан сүүрүүгэ Арассыыйа чөмпүйэнээтэ Москваҕа ыам ыйын 15 күнүгэр күнүс 12 чааска старт бэриллибитэ уонна оруобуна биир суукканан бэҕэһээ, ыам ыйын 16 күнүгэр, 12.00 чааска финиш буолбута. Сүүрэн бүтэн эрдэхпитинэ күрэхтэһээччилэргэ барыбытыгар мас биэрбиттэрэ. Бириэмэ бүттэ диэбиттэрин кытары ол маспытын тиийбит сирбитигэр уурабыт.
Мин бу көрүҥҥэ быйылгыттан Татьяна Юрьевна Жирковаҕа дьарыктанан саҕалаабытым. Тохсунньуттан түөрт ый дьарыктанным. Сууканан сүүрүүгэ Арассыыйа рекордун оҥорор сыаллаах кыттыбытым, ол эрээри ол санаам кыаллыбата.
Бастаабыт кыыһы сыыйа эккирэтиэхтээх этим. Ону наһаа түргэнник эккирэтэммин түүн 2 чааска графикпыттан тахсан хаалбытым. Сэниэбин барытын онно ыытан кэбистим. Бэйэм графикпынан барбытым буоллар биллэ саппаастаах этим, бастыыр иһин киирсэр кыах баара. Арассыыйа рекорда 247 км этэ, мин 245 км кэлэн хааллым, бастаабыт кыыс 252 км кэллэ.
Быйылгы күрэхтэһииттэн уопут ыллым. Эһиил хайаан да кыттыаҕым, Арассыыйа рекордун оҥорон баран тэйэр санаалаахпын.
Надежда Ильина, edersaas.ru