Маны аах Успуорт

Сүүрүүк Ирина Осипова биир дойдулаахтарын үөртэ

Бэрдьигэстээххэ буолбут «Манчаары оонньууларыгар» СӨ Ис Дьыала министиэристибэтин үлэһитэ, Горнай бастакы хамаандатын бэрэстэбиитэлэ Ирина Осипова-Кондакова бэтэрээннэргэ 3000 миэтирэни сүүрүүгэ кыһыл көмүс мэтээли ылан, биир дойдулаахтарын үөртэ. 

Ирина Осипова-Кондакова этэринэн, кини «Манчаары оонньуулара» Бэрдьигэстээххэ ыытылларын истээт даҕаны, дойдутун Горнай улууһун хамаандатыттан кыттарга быһаарыммыт. Оччолорго Ирина тута дойдубар кыһыл көмүс мэтээли аҕалыахтаахпын диэн бэйэтигэр сыал-сорук туруоруммут эбит:

— Ый аннараа өттүгэр мэтээлбин түөспэр кэтэн турарбын өйбөр оҥорон көрбүтүм. Мин кыайыыбар эрэллээх этим. Бэлэмнээх, дьарыктаах буоламмын, улахан сырабын уурбакка, күүлэйдии сылдьар курдук сүүрдүм диэххэ сөп. Сүүрэн иһэммин дьону кытта кэпсэтэ, камераҕа далбаатыы испитим. Мин күрэхтэһииттэн күрэхтэһиигэ эрэ буолбакка, сыллааҕы былаан оҥостон дьарыктанабын.

«Манчаары оонньууларыгар» бастакыбын оскуолаҕа үөрэнэ сылдьаммын, 1999 сыллаахха Тааттаҕа кыттыбытым. Онно кыргыттарга сүүрэн, төрдүс буолбутум. Ол кэнниттэн Мэҥэ Хаҥаласка буолбут оонньууларга финишкэ кыһыылаахтык ситтэрэммин, эмиэ төрдүс буолан хаалбытым. Үөһээ Бүлүүтээҕи «Манчаарыга» Сардаана Трофимоваҕа уонна Наталья Леонтьеваҕа хотторбутум. Оччолорго 3 килэмиэтирэни 9,50 мүнүүтэнэн кэлбитим, оттон бу оонньууларга 10,30 мүүнүүтэнэн фиништээтим. Ол аата өссө даҕаны саппаастаах cүүрэн кэллэҕим.

Бу кыайыыбын аҕабар Василий Еремеевич Кондаковка аныыбын. Горнайым бар дьоно-сэргэтэ көрөн олордоҕуна кыайыбытым эппиэтинэстээх да, үөрүүлээх да буолла. Төһө даҕаны кыайардыы оҥостубутум иһин, санныбар сүгэһэр курдук эппиэтинэс сүктэриллэ сылдьыбыта.

Саҥа тутуллубут «Чыпчаал» стадиоммут сүүрэргэ бэртэхэй. Биир дойдулаахтарым успуорка үрдүк көрдөрүүлэрдэнэллэригэр эрэнэбин. Успуорду таптааҥ, дьарыктаныҥ!

Айтана Аммосова, edersaas.ru

0
0