Бэҕэһээ «ОФСЕТ» ХЭТ саха дьахталларыттан бастакы бэйиэт Варвара Потапова талааныгар сүгүрүйүү истиҥ киэһэтин бэлэхтээтэ.
ХИФУ «Күннээх халлаан» түмсүүтэ В.Потапова «Мин кэлэр үйэлэргэ кэриэс кэһиибин…» диэн саҥа кинигэтин таһааттарбытын сүрэхтээһинэ буолла. «Дьон биһирэбилэ» диэн айар-суруйар дьону түмтэ.
Махтал буоллун тэрийбит, кыттыбыт, көрсүһүүнү ырыанан киэргэппит, биэчэри иилээн-саҕалаан ыыппыт дьоҥҥо барыларыгар!
ТУРУКПУТ ТУБУСТА!
Суруйар эйгэҕэ сылдьааччы
«ОФСЕТ ХЭТ» диэн кимин билэллэр,
Бэҕэһээ бэртээхэй тэрээһин
Офсеппыт бар дьоҥҥо тэрийдэ.
Талааннаах Варвара бэйиэккэ
Ахтыһыы биэчэрин оҥордо,
Ааттаахтар-суоллаахтар, аймахтар
Үтүөкэн көрсүһүү түгэнэ!
Икки сыл хаайтаран олорбут
Турукпут, санаабыт тубуста!
Маанылаах остуола, бэлэҕэ
Соһуччу үөрүүгэ куустарда!
Көрдүм мин дьон киэнэ килбиэнин:
Зоябыт ол «сойбот» талаанын
Варвара хоһоонун ураты
Иэйиилээх ааҕыытын иһиттим!
Наука доктора диэн дьону
Аҥардас мин толло истэбин,
Бэҕэһээ дьэ илии тутустум
Кинилиин кыл түгэн мин илэ!
Саргы Куо саргылаах бэйиэттиин
Аҕыйах тылынан алтыстым
Уонна дьэ ырыанан эргиттим
Эдэртэн ылларбыт тылларбын:
«Түннүкпэр тураммын
Көрдөстүм ардахтан:
«Аҕал миэхэ кинини,
Аҕал миэхэ тапталбын…»
Норуоппут бэйиэтэ Мигалкин
Олоҕор Варяны иккитэ
Көрсүһэн ааспытын кэпсээтэ
Ураты ол икки түгэни.
Ньурбаттан төрүттээх Егоров
Ырыата хамнатта заал иһин,
Саастары, чыыннары аахсыбат
Үҥкүүгэ дьэ тэйэн ыллыбыт.
«Офсеты» салайар Даарыйа
Таһыгар да көстөр хоһууна,
Киһилии сыһыанын сэмэйэ,
Мэйиитин толкуйа дэгиттэр.
Махтанар тыл татым буолуоҕун
Билэбин мин бэйэм кыбыста,
Поэзия күнүнэн даҕатан
Суруйар дьоннорго ЭҔЭРДЭ!
СҮППЭТ ДЬЫЛҔА
/поэтесса В.Потаповаҕа/
Уһун суһуох Варвара
Нуучча норуот номоҕо,
Саха кыыһа Варвара
Кылгас олох, суһуох суох.
Кылгас буоллар даҕаны
Аатын алмаас сүкпүтэ,
Кылгас буоллар даҕаны
Биллэрбитэ бэйэтин.
Ньурба кыыһа Варвара
Дьахталлартан бастакы
Саха сэмэй тапталын
Аһаҕастык туойбута.
Орто сирбит олоҕор
Үөһэлэртэн суруллан
Христостуун тэҥ сааска
Барбыттара бу сиртэн.
Барбыт сүппэт дьылҕатын
Быһаарбыта талаана,
Үйэлэри уҥуордаан
Варя аата ааттаныа!
Полина-Победа,
Уус-Алдан