Саха сирэ оскуолаларга эбии тутууга биир миллиартан тахса солкуобайы ылыаҕа.
Бу күннэргэ Саха сириттэн Дьокуускай куорат уокуругар үс оскуолаҕа эбии тутууну ыытарга федеральнай субсидияны аныыр туһунан киирбит сайаапкаларга, РФ Үөрэҕирии министиэристибэтэ сөбүлэһэрин биллэрбит.
Н.О.Кривошапкин аатынан 5 №-дээх, Пригороднай бөһүөлэк 12 №-дээх, П.Н. уонна Н.Е.Самсоновтар ааттарынан Хатас орто оскуолаларыгар эбии тутууларга эрэгийиэн 1 млрд 99 мөл.солк. ылыаҕа.
Эбии тутууларга: 5-с №-дээх оскуола эбии тутуута 274 үөрэнээччигэ суоттанар, 12 №-дээх оскуола — 326 миэстэҕэ, Хатас орто оскуолата — 120. Эбийиэктэр 2022 сылга үлэҕэ киллэриллэллэр.
Дьокуускай куорат оскуолаларыгар эбии миэстэлэри тэрийии эрэгийиэн салалтатын сүрүн соруктарыттан биирдэстэринэн буолар. Өрөспүүбүлүкэ сайаапкатыгар сөбүлэһии, үөрэҕи сайыннарыыга улахан суолталаах.
Федеральнай бүддьүөттэн үп ананыыта, СӨ Ил Дархана Айсен Николаев, эрэгийиэн бырабыыталыстыбата федеральнай киини кытары улахан тиһиктээх үлэлэринэн ситиһилиннэ.
Айсен Николаев оскуолалары, кыһаларга эбии тутуулары ыытарга, ону сэргэ оскуолаларга үөрэх миэстэтин эбэргэ материальнай-тэхиньиичэскэй баазаларын туругун учуоттаан туран тутууну атыылаһарга,
федеральнай бүддьүөттэн үбү тыырыы мэхэньиисимин хаттаан көрүү боппуруоһун хаста даҕаны көтөхпүтэ.
Ил Дархан бу этиини былырыын кулун тутарга РФ Үөрэҕирии миниистирин Сергей Кравцову кытары көрсүһүүтүгэр эмиэ иһитиннэрбитэ.
Айсен Николаев өссө Дьокуускай куорат баһылыгынан олорон, саҥа оскуолалары тутуу боппуруоһугар, ону сэргэ куорат киинигэр оскуолалары салгыырга, тутуулары эбии ыларга улахан болҕомтотун уурара.
Өрөспүүбүлүкэ салайааччыта киин куорат оскуолалара наһаа толоруларын, бу үөрэх эйгэтигэр улахан кыһалҕаны үөскэтэрин бэлиэтээн туран, федеральнай киини кытары сыаллаах-соруктаах үлэни тиһиктээхтик ыытар.
СӨ салалтата уонна бырабыыталыстыба РФ Үөрэҕирии министиэристибэтин кытары ыллыктаах, быһаарыылаах кэпсэтиилэри ыытар буолан, эрэгийиэҥҥэ аныгы үөрэх инфраструктуратын тэрийиигэ көдьүүстээх үлэ ыытыллар.
+1
+1
+1
+1
+1
+1
+1