Айылҕа харыстабыла

Үс ойуур баһаара умуруоруллубут, 16 бохсуллубут

Бүгүн, от ыйын 23 күнүгэр, СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников иһитиннэрбитинэн, бүгүҥҥү туругунан өрөспүүбүлүкэҕэ 1 544 260 га иэннээх сиргэ 235 ойуур баһаара бэлиэтэнэр.

Бүгүн сарсыарда 63 ойуур уотун умуруорууга үлэ ыытылла сылдьара этилиннэ. Уоту утары 2 066 киһи 259 тиэхиньикэ үлэлии сылдьар.
Кэнники хонук устатыгар үс ойуур баһаара умуруоруллубут, 16 бохсуллубут, 11 саҥа баһаар булуллубут.
Гидрометсулууспа бэрэстэбиитэлэ иһитиннэрбитинэн, улахан ойуур баһаардара Горнай, Нам, Уус Алдан, Томпо, Өймөкөөн, Мииринэй оройуоннарыгар бэлиэтэнэллэр.
РФ ЫБММ Бе-200 үс көтөр аала Ньурба улууһугар ойуур баһаарын умуруорууга үлэлээбиттэр. Ми-8 икки бөртөлүөт авиаботуруулааһыҥҥа уонна авиалесоохрана тус састаабын атын сиргэ көһөрүүгэ, ону сэргэ «Өлүөнэ очуостара» национальнай пааркаҕа уоту умуруорууга көмөлөспүттэр.
ЫБММ авиацията биир хонук устатгар 35-тэ көппүт, 131 төгүл ууну куппут. РФ Оборонаҕа министиэристибэтин  алта салгын аала ойуур баһаардарын умуруорууга кыттыбыттар, ол иһигэр Ил-76. Уу кутар тэриллээх Ми-8 икки бөртөлүөт Горнай уонна Ньурба улуустарыгар ойуур баһаардарын умуруорууга үлэлээбиттэрин туһунан этиллэр. Оборона министиэристибэтин аиацията биир хонук устатыгар 308 туонна ууну бырахпыт. Зондировщик сөмөлүөт суукка устатыгар Горнай улууһун сиригэр-уотугар үлэлээбит.
0
0