“СӨ ОДьКХ” ГУП сааскы халаан уутун куттала суох аһарыыга бэлэмнэнэр. Тэрилтэҕэ халаан уутугар бэлэмнэнии былаана бигэргэммит, маннык түгэҥҥэ сылааһынан хааччыйар эбийиэктэр бэлэм буолуохтаахтар.
Анал хамыыһыйа тэриллэн, халаан уутун кэмигэр бары ыытыллар тэрээһиннэри сүрүннүөҕэ.
Тэрилтэ киин диспетчерскэй сулууспата иһитиннэрбитинэн, филиалларга сааскы халаан кэмигэр туһаныллар дезинфекциялыыр сириэстибэлэр саппаастара баар, ону аналынан ыраастыыр үлэҕэ туһаныахтара. Үлэһиттэргэ инструктажтар бэриллэн, эрчиллэр үлэлэр ыытыллыбыттар. Маны сэргэ ууну хачайдыыр, оботторор тэриллэр, уоту биэрэр саппаас источниктар бэлэмнэр.
Билигин ОДьКХ биригээдэлэрэ ууга барыан сөптөөх сирдэргэ гидро-тэхиньиичэскэй тутуулары, ууну ылар сирдэри, уматык ыскылааттарын, өрөмүөҥҥэ туһаныллар матырыйааллары уонна хочуолунай оттугун, носуос ыстаансыйатын, хочуолунайдары бэрэбиэркэлииллэр.
Тэрилтэ генеральнай дириэктэрэ Виталий Чикачев этэринэн, бары хочуолунайдарга уот барар түбэлтэтигэр үлэлиир саппаас мотуордар бэлэмнэр, тиийэр оттук баар.
”Тэрилтэ үлэһиттэрэ халаан тахсар түгэнигэр толору бэлэмнээхтэр. Кутталлаах сирдэргэ турар эбийиэктэр страховкламмыттар. Маннык куттал тирээтэҕинэ суһаллык туоратыыга анал тиэхиньикэ уонна массыыналар бэлэмнэр. Оройуоннар быыһыыр сулууспаларын уонна олохтоох салайыныы уорганнарын кытта бииргэ үлэлээһин былаана торумнанна”, — диэтэ стратегическай суолталаах тэрилтэ салайааччыта.
“СӨ ОДьКХ” ГУП пресс-сулууспата
Бэлэмнээтэ Женни СТРЮКОВА, “Саха сирэ” хаһыат
Хаартыска: тустаах саайтан