“СӨ ОДьКХ” ГУП үлэһиттэрин доруобуйатыгар хайдах кыһалларын манна ааҕыҥ уонна бастыҥ уопуту туһаныҥ.
Ааспыт нэдиэлэҕэ “СӨ ОДьКХ” ГУП Бүлүүтээҕи филиалыгар үлэ буортулаах уонна ыарахан усулуобуйатыгар үлэлээччилэргэ доруобуйаларын туругун көрүү түмүктэннэ. Сыл аайы ыытыллар быраастар көһө сылдьан көрүүлэрин тэрилтэ үлэни-хамнаһы хонтуруоллааһыҥҥа уонна үлэ харыстабылыгар управлениета тэрийэр.
Тохсунньу ый саҕаланыыта Мэҥэ Хаҥалас филиалын үлэһиттэригэр медкөрүү ыытыллыбыта. Бүлүү улууһун кэнниттэн быраастар көһө сылдьар биригээдэлэрэ Үөһээ Бүлүү, Ньурба уонна Сунтаар улуустарынааҕы салааларга тиийиэҕэ. Бу сыл муус устар ый бүтүүтүгэр диэри булгуччулаах мэдиссиинискэй көрүүнү атын филиалларга тэрийиэхтэрэ.
Үлэ харыстабылын отделын начаалынньыга Аяна Стрекаловская иһитиннэрэринэн, маннык көһө сылдьан көрүүнү “СӨ ОДьКХ” ГУП 2015 сылтан ыытар. “Оператордар, машинистар, слесардар доруобуйаларын харыстыыр туһуттан куруук мэдиссиинэ көрүүтүн ааһыахтаахтар. Сорох оройуоннарга бүччүм идэлээх исписэлиистэр суохтар уонна психиатрга көрдөрүнэр кыаллыбат, ол иһин алтыс сылын субуруччу маннык көһө сылдьан көрүүлэри тэрийэбит”, — диэтэ кини.
Уустук усулуобуйаҕа үлэлиир Бүлүүтээҕи хомунаалынай хаһаайыстыба үлэһиттэрэ икки күн устатыгар ирдэнэр анаалыстары туттардылар, невропатолокка, кардиолокка, офтальмолокка, хирурга, отоларинголокка уонна да атын исписэлиистэргэ көрдөрдүлэр. Ону тэҥэ эхоэнцефалографияны, электрокардиографияны уонна флюорографияны аастылар.
“СӨ ОДьКХ” ГУП пресс-сулууспата
Бэлэмнээтэ: Женни Стрюкова
Хаартыска: тустаах саайтан