Дьааҥы филиала хайдах тэриммитий?
Өрөспүүбүлүкэҕэ хааччахтааһын эрэсиимэ олохтонуоҕуттан “СӨ ОДьКХ “ ГУП бары санитарнай ирдэбиллэри толорон, ыарыы тарҕамматын туһугар сэрэтэр үлэни ыытар.
Ол курдук, Дьааҥытааҕы филиалга кэккэ тэрээһиннэри ыыттылар. “Административнай дьиэҕэ гражданнары уонна манна кэлээччилэри приемнааһын тохтоото. Дьон аҕалбыт докумуоннарын анал дьааһыкка түһэрэллэр. Үлэһиттэр сорохторун тэйиччиттэн үлэҕэ көһөрбүппүт”, — диэн филиал салалтата иһитиннэрдэ.
Күннэтэ дьиэни-уоту сииктээх тэрээпкэнэн сотоллор, дьиэни салгылаталлар, температураны күҥҥэ иккитэ кэмнииллэр. Мааскалары биэрэллэр, антисептиктар туруорулуннулар.
Нэдиэлэ аайы филиал исписэлиистэрэ анал болдьоҕунан дьиэни-уоту дезинфекциялыыллар. Маныаха кураанах туман генераторын туһаналлар. Эмтээһини оҥорор киһи анал таҥаһы кэтэр. Санитарнай ыраастаныыны бары производственнай эбийиэктэргэ ыыталлар.
“СӨ ОДьКХ” ГУП пресс-сулууспата
Женни Стрюкова бэлэмнээтэ
Хаартыска: тустаах саайтан