Маны аах Тыа хаһаайыстыбата

Сүөһү кыстыгар уустук балаһыанньа үөскээтэ

Атырдьах ыйын ортотун ааста да ардах тохтообот эбит. Ол курдук, уһун ардах түмүгэр ходуһа 100% ууга барда. Бүгүҥҥү даннайынан, Бүлүү улууһун Дьөккөн нэһилиэгэ 253 туонна эрэ оттоохпут. Онтукайбыт да ууга барда.

248 га охсуллубут от икки саамай оттонор ходуһаларбытынан, ол эбэтэр Алааһынан уонна Илин, Орто Эбэлэринэн ууга сыталлар. 900-1000 кэриҥэ бугул ууга барда. Былаантан 22 бырыһыан эрэ толорон олоробут. Дьиҥэ, икки күөлбүт Алаас уонна Эбэлэр ууларын хоруутун ыраастатан ууну түһэрбиппит да, уу халлаантан түһэн, систэр уулара ойууртан киирэннэр, үрэхтэр уулара сааскылыы сытар.

Маннык балаһыанньаҕа хайдах сүөһүбүтүн кыстатабыт диэн толкуйга олоробут. Бу уустук балаһыанньа үөскээбитинэн сибээстээн, сүөһү төбөтө тастан көмө суох буоллаҕына аччыыра чуолкай. Онон үгүс сүөһүлээх ыал толкуйга түстэ. Атын сиргэ оттуу барыаҕы барытыгар маннык балаһыанньалаах олороллор. Хаҥалас диэки өрүс уута киирэн бэйэлэригэр уустук, Үөһээ Бүлүү диэки барыаҕы эмиэ ардах дииллэр. Уопсайынан, Бүлүү бөлөх арҕаа сытар улуустарга Мииринэйтэн саҕалаан ардах эбит.

Бу уустук балаһыанньа буолбутунан сибээстээн, мин маннык этиилэри улуус суһал ыстаабыгар киллэрэбин:

1. Отторо ууга барбыт нэһилиэктэргэ тахсан балаһыанньаны көрөргө, нэһилиэнньэни кытта көрсөн кэпсэтэргэ;

2. Сүөһү төбөтүн аччаппат инниттэн эрдэттэн сайаапка хомуйан тастан оту аҕалары үөрэтиэххэ;

3. Сүрүн оттонор ходуһалар ууга барбыттарынан сибээстээн, сир төһө уулааҕын быһаартарарга. Тоҕо диэтэххэ уһун ардахтар содулларыгар сатыы да киһи сылдьыбат буолуор диэри үктэл сирдэр сытыйдылар. Тиэхиньикэ сатаан сылдьыбат;

4. Оттуур сирдэргэ барар суоллары, муосталары өрөмүөннүүргэ харчы көрөргө;

5. Бырабыыталыстыбаттан ардаҕы түһэрбэккэ, уулаах мунньуллубут былыты ыһар гына дьаһанарга көмө көрдүүргэ. Баһаар барыа диэн былыты ытыалаан маннык буоллубут дуу диэн санаа баар.

6. Мантан күһүн оттоммут от соппоҥо биллэр, онон комбикормунан хааччыллыы боппуруоһун үөрэтиэххэ.

Дьөккөнтөн Альбина Ионовна.

0
1
Telegram @edersaas20