Олунньу 1 күнүгэр ыытыллыбыт «Саха сирин киэн туттуута – 2019» норуот бириэмийэтигэр «Доброволец-эколог» номинациянан кыайыылаахтары быһаарыы бастакы түһүмэҕэр биэс киһи бастыҥ эколог иһигэр киирбитэ.
edersaas.ru
Кинилэртэн биирдэстэрэ — Бүтүн Арассыыйатааҕы «Айылҕа харыстабыла» уопсастыба чилиэнэ, «Арассыыйа ийэлэрэ» уопсастыбаннай хамсааһын чилиэнэ, Таатта улууһун «Сатабыл» оҕо айар дьоҕурун дьиэтин эбии үөрэхтээһиҥҥэ педагога, «Уодай» балаакканан көһө сылдьар дьиэ кэргэн лааҕырын үлэлэтэр, «Толлуман» диэн кыраайы үөрэтэр куруһуогу салайар Октислава Аргунова буолар.
Оскуола оҕолоро сайын ахсын бу лааҕырга сылдьан, төрөөбүт дойдуларын үөрэтэллэр, туризмы сайыннарыыга үөрүйэхтэнэллэр, дьиэ кэргэҥҥэ үлэнэн иитии ньымаларын билсэллэр итиэннэ айар дьоҕурдарын сайыннараллар. Оттон кыһыҥҥы өттүгэр куруһуокка балыктааһын, муҥхалааһын, булт ньымаларын билсэллэр. Кырдьаҕастарга, бэтэрээннэргэ мастарын, муустарын булунарга көмөлөһөн, махтал бастыҥын ылаллар. Октислава Владиславовна араас бырайыактары толкуйдаан, үлэтин ис хоһоонун байытан, кэҥэтэн иһэр. Ол курдук, оскуолаҕа үөрэнэр оҕолордоох төрөппүттэргэ уонна учууталларга анал туурдары тэрийэн, кинилэргэ ытык Таатта ураты айылҕатын кэрэтин арыйда. Кини салалтатынан, Таатта волонтер-төрөппүттэрэ 2017 сыллаахха куонкуруска бастаабыттара, былырыын «Арассыыйа ийэлэрин» куонкуруһугар үһүс миэстэҕэ тиксибиттэрэ. Лааҕыр салайааччыта бэйэтэ “Дьокуускай — Үөһээ Бүлүү – Чурапчы – Таатта – Өймөкөөн” диэн экологическай ыллык бырайыагынан «Үс Кут — Үс Сэргэ” өрөспүүбүлүкэтээҕи эспэдииссийэҕэ кыттыбыта. Бу үлэтин түмүгүнэн «Төлөннөөх таатталар» диэн сурунаалы итиэннэ «Биһиги дойдубут кэрэ-бэлиэ сирдэрэ» диэн аккырыыккалар кэмпилиэктэрин бэчээттэтэн таһаарда.
Октислава Владиславовна уонна Семен Федотович Аргуновтар түөрт кэрэчээн кыыстаахтар. Ыал аҕата сарсыарда аайы тымныы уунан куттан, оҕолоругар чөл олох үтүө холобурун көрдөрөр.
– Биһиги аҕабыт бултуурун сөбүлүүр, ол гынан баран, чуумпу булду: хаартыскаҕа түһэрэрин уонна балыктыырын ордорор, — диэн Айкуо төрөппүттэрин туһунан киэн тутта кэпсиир. — Биһиги дьиэ кэргэнинэн айылҕаны таптыыбыт, хас саас аайы балыктыыбыт. Ийэбит балык хаптардаҕына үөрбүт харахтарын көрүө этигит! Төрүт уоттана, аптаах лаампа курдук сырдыгынан сыдьаайа түһэллэр. Ийэбит хаартыскаҕа түһэрэрин сэргэ эрбиинэн табыгастаахтык, сымсатык туттан үлэлиир, аны бэргэнник ытарынан эр дьону да баһыйар, массыынаны бэркэ ыытар. Дьиэбитигэр эркин хаһыатын таһаарабыт. Бу үтүө үгэспит биһигини түмсүүлээх буоларга үөрэтэр. Өссө төрөппүттэрбит лааҕырдарынан уонна доҕотторбутун кытары төрөөбүт дойдубут кэрэ-бэлиэ сирдэринэн айанныырбытын олус күүтэбит. Сайын тымныы оройунан аатырар Өймөкөөҥҥө баран кэлбиппитин хаһан да умнуохпут суоҕа.
Надежда Егорова, «Саха сирэ» хаһыат edersaas.ru