СӨ Култууратын уонна духуобунай сайдыытын миниистирэ: «Биһиги ыалдьыттарга уонна саҥа испэктээкиллэргэ үөрэбит»
Балаҕан ыйын 26 күнүгэр Суорун Омоллоон аатынан опера уонна балет тыйаатырыгар И.А.Гончаров аатынан Ульяновскай драма тыйаатыра «Бедная Лиза» диэн биир көстүүлээх испэктээкилин туруорда.
Тэрээһин хардарыта икки тыйаатыр гостуруоллааһынын чэрчитинэн ыытыллыбыт. Опера уонна балет тыйаатырын сыанатыттан СӨ Култууратын уонна духуобунай сайдыытын миниистирэ Юрий Куприянов эҕэрдэлээтэ. Кини Саха сирэ кэлэр ыалдьыттары уонна саҥа испэктээкиллэри үөрэ көрсөрүн бэлиэтээтэ. Маныаха РФ култууратын уонна уонна РОСКОНЦЕРТ диэн Федеральнай муусука бэстибээллэрин бырагырааммаларын дириэксийэтин өйөбүлүнэн эрэгийиэннэр икки ардыларынааҕы «Улахан гостуруоллар» диэн бырагыраамма-бырайыак сүрүн оруолу ылбытын эттэ.
Ульяновскайдааҕы И.А.Гончаров аатынан драма тыйаатыра Саха сиригэр аан бастакытын кэллэ. Гостуруоллуур тур анал бырагырааматыгар А.Крым «Завещение» диэн испэктээкил-нэһилиэстибэ киирбит. Оттон тыйаатыр сүрүн сирэйинэн Н.М.Карамзин «Бедная Лиза » айымньыта буолар. Бу испэктээкили Кипр өрөспүүбүлүкэтэ уонна атын да эрэгийиэннэр бэркэ биһирээбиттэрэ. Биллиилээх суруйааччы, историяны үөрэтээччи Николай Карамзин 200 сыл анараа өттүгэр бу айымньытын суруйбута. Испэктээкил Арассыыйа Бэрэсэдьиэнин граныгар тиксибитэ. Испэктээкил режиссера Сергей Морозов айымньыны аныгы киһини толкуйдатар гына көрдөрбүт. Бу испэктээкил «Отечество и судьбы. История Государства Российского» диэн бэстибээлгэ кыттыбыта. Режиссер бастыҥ быһаарыыта диэҥҥэ лауреат аатыгар тиксибитэ. («Лицедей» диэн Ульяновскай уобалас тыйаатырдарын бэстибээлигэр 2015 c.) ону таһынан Карамзин айымньытын итэҕэтиилээхтик көрдөрүү иһин Дойдулар икки ардыларынааҕы Сергиев Посадка ыытыллыбыт бэстибээлгэ бастыҥ уус-уран киэргэтии иһин 2015 c, 2019 сыллаахха Тыйаатыр сылыгар испэктээкил «Кипрга Арассыыйа тыйаатырдарын кэмэ» диэн аан дойдутааҕы бырайыак бырагыраамматыгар киирбитэ.
Ульяна ЗАХАРОВА.
Хаартыска СИА-ттан туһанылынна.